مری گلیات اور گردونواح میں طوفانی بارش اور برفباری کی پیشگوئی، سیاح احتیاطی تدابیر اختیار کریں

پنجاب ڈیزاسٹر مینجمنٹ اتھارٹی (پی ڈی ایم اے) نے مری، گلیات اور گردو نواح میں شدید طوفانی بارش اور برفباری کی پیش گوئی کی ہے۔ پی ڈی ایم اے نے کہا کہ ہفتہ اور اتوار کو شدید برفباری کے امکانات 70 فیصد تک ہیں، سوموار کو بھی بارش اور برفباری کے 75 فیصد امکانات ہیں۔

محکمہ موسمیات کی پیشگوئی کیا ہے؟

محکمہ موسمیات کے مطابق 17 فروری (رات) سے 21 فروری کے دوران ملک کےبالائی / وسطی علاقوں میں تیز ہواؤں اور گرج چمک کے ساتھ شدید بارش (پہاڑوں پر برفباری) جبکہ چند مقامات پر ژالہ باری کا امکان ہے۔

اس دوران دوران گلگت بلتستان میں دیامیر، استور، غذر، اسکردو، ہنزہ، گلگت، گانچھے، شگر جبکہ کشمیر میں وادی نیلم، مظفرآباد، پونچھ، ہٹیاں، باغ، حویلی، سدھنوتی، کوٹلی، بھمبر اور میر پور میں تیز ہواؤں اور گرج چمک کے ساتھ وقفے وقفے سے درمیانی سے تیز موسلادھار بارش اور پہاڑوں پر برفباری کا امکان ہے، چند مقامات پر ژالہ باری کی بھی توقع ہے۔

17 فروری کی رات سے 20 فروری کے دوران چترال، دیر، سوات، ایبٹ آباد، مانسہرہ، ہری پور، کوہستان، شانگلہ، بونیر، کرک، خیبر، پشاور، چارسدہ، نوشہرہ، صوابی، بونیر، باجوڑ، کرم، وزیرستان، کوہاٹ، بنوں اور ڈیرہ اسماعیل خان میں تیز ہواؤں اور گرج چمک کے ساتھ وقفے وقفے سے درمیانی سے تیز موسلادھار بارش اور پہاڑوں پر برفباری کا امکان ہے، اس دوران چند مقامات پر ژالہ باری کی بھی توقع ہے۔

اس دوران مری، گلیات، اسلام آباد، راولپنڈی، اٹک، جہلم، چکوال، منڈی بہاؤالدین، میانوالی، خوشاب، سرگودھا، گجرات، گوجرانوالہ، حافظ آباد، فیصل آباد، جھنگ، سیالکوٹ، نارووال، لاہور اور قصور میں تیز ہواؤں اور گرج چمک کے ساتھ وقفے وقفے سے درمیانی سے تیز موسلادھار بارش اور پہاڑوں پر برفباری کا امکان ہے۔

18 اور19 فروری کو ملتان، بھکر، کوٹ ادو، لیہ، راجن پور اور ڈیرہ غازی خان میں تیز ہواؤں اور گرج چمک کے ساتھ ہلکی سے درمیانی بارش کا بھی امکان ہے۔ اس دوران چند مقامات پر ژالہ باری کی بھی توقع ہے۔

بلوچستان میں 18 فروری کی شام/رات اور 19 فروری کو کوئٹہ، زیارت، چمن، پشین، قلعہ عبداللہ، قلعہ سیف اللہ، ژوب، شیرانی، بارکھان، موسیٰ خیل اور کوہلومیں تیز ہواؤں اور گرج چمک کے ساتھ بارش اور پہاڑوں پر برفباری کا امکان ہے۔

صوبہ سندھ میں 18 سے 20 فروری کے دوران صوبہ کے جنوبی علاقوں میں موسم خشک رہنے کے علاوہ آندھی اور تیز ہوائیں چلنے کا امکان ہے۔

ممکنہ اثرات اور احتیاطی تدابیر:

18 سے 20 فروری کے دوران مری، گلیات، ناران، کاغان، دیر، سوات، کوہستان، مانسہرہ، ایبٹ آباد، شانگلہ، استور، ہنزہ، اسکردو، وادی نیلم، باغ، پونچھ اور حویلی میں تیز بارش اوربرفباری سے سڑکیں بند اور گاڑیوں کی آمد ورفت میں خلل کا امکان ہے۔

اس دوران بالائی خیبر پختونخوا، مری، گلیات، کشمیر اور گلگت بلتستان میں لینڈ سلائیڈنگ کا بھی خدشہ ہے۔ آندھی، جھکڑ ، ژالہ باری، گرج چمک اور تیز بار ش کے باعث کمزور انفرا سٹرکچر ( بجلی کے کھمبے اور سولر پینل وغیرہ)کو نقصان کا اندیشہ ہے۔

آندھی، بارش اور برفباری کے دوران کسانوں اور سیاحوں کو محتاط رہنے کی ہدایت اور تمام متعلقہ اداروں کو اس دوران ’الرٹ‘ رہنے کی ہدایت کی گئی ہے۔