اسلام آباد، خطہ پوٹھوہار، کشمیر اور گلگت بلتستان میں مزید بارش اور پہاڑوں پر برفباری کا امکان ہے۔
محکمہ موسمیات کے مطابق گزشتہ روز خیبرپختونخوا اور کشمیر کے پہاڑوں پر برفباری ہوئی، کالام میں شدید برفباری کے باعث رابطہ سڑکیں بند ہوگئیں، کالام میں گزشتہ 36 گھنٹوں میں 2.5 فٹ برف پڑ چکی ہے، چترال میں شدید برفباری کے باعث لواری ٹنل بھی ٹریفک کے لیے بند ہوگئی ہے۔
🟢 کالام میں گزشتہ 36 گھنٹوں سے برف باری کا سلسلہ جاری ہے، اب تک 2.5 فٹ برف پڑ چکی ہے۔ 🌨️🥶🌨️🥶🌨️
Weather Updates PK 2.0 – Jawad Memon / Pakistan Doppler pic.twitter.com/y2izvnaF9D
— Weather Updates PK (@WeatherWupk) February 19, 2024
چترال میں لواری ٹنل کے اطراف میں 3 فٹ تک برف پڑی، گلگت بلتستان میں غزر ویلی میں برفباری اور بارش کا سلسلہ جاری ہے، برفباری سے متعدد علاقوں کا زمینی رابطہ منقطع ہوگیا ہے،غزر روڈ کے مختلف علاقوں میں مٹی کے تودے گرنے سے شہریوں کو آمدورفت میں مشکلات کا سامنا ہے۔
آزاد کشمیر کے بالائی علاقوں میں بارش اور برفباری کا سلسلہ تیسرے روز بھی جاری ہے، وادی لیپا کے زیریں علاقوں میں بھی 3 فٹ تک برف پڑ چکی ہے۔
شدید برفباری کے باعث وادی لیپہ کو مظفرآباد سے ملانے والی شاہراہ ریشیان کے مقام سے بند ہوگئی ہے جبکہ شاہراہ نیلم دواریاں سے آگے بند ہے، نوسیری کے مقام پر لینڈ سلائیڈنگ سے بھی شاہرہ نیلم بند ہوگئی ہے۔
آزاد کشمیر کی جہلم ویلی میں گڑھی دوپٹہ اور ہٹیابالا جانے والی ٹریفک کو متبادل روٹ پر موڑ دیا گیا ہے، مظفرآباد میں لوہار گلی کے مقام پر لینڈ سلائیڈنگ سے ٹریفک کی روانی متاثر ہوئی ہے۔
مری، ایوبیہ اور نتھیا گلی میں شدید برفباری سے مختلف سڑکوں پر سیاحوں کی گاڑیاں پھنس گئی، مری میں طوفانی ہواؤں سے ژالہ باری سے مواصلاتی نظام درہم برہم ہو گیا ہے۔
🔴 مری شدید طوفانی بارش نے تباہی مچادی – ہم اپنے پلیٹ فارم سے پہلے ہی خبردار کر چکے ہیں کہ مری اور ملحقہ علاقوں میں شدید موسمی واقعات رونما ہوں گے۔ 😱⛈️🌨️
Weather Updates PK 2.0 – Jawad Memon / Pakistan Doppler pic.twitter.com/OETf1UYa5x
— Weather Updates PK (@WeatherWupk) February 19, 2024
مری میں 8 انچ برف پڑچکی ہے، مری ایکسپریس وے پر پھسلن کے باعث بدترین ٹریفک جام ہے، برفباری کے ساتھ بجلی کا بریک ڈاؤن ہوگیا ہے، بیشتر علاقوں کو بجلی کی سپلائی متاثر ہے جس سے سیاحوں اور مقامی افراد کو مشکلات کا سامنا ہے۔
دوسری جانب جڑواں شہروں راولپنڈی اور اسلام آباد میں بھی بارش کھل کر برسی ہے، راولپنڈی اسلام آباد میں دھواں دھار بارش سے نشیبی علاقے زير آب آگئے، محکمہ موسمیات نے اسلام آباد میں مزید بارش کی پیشگوئی بھی کی ہے۔
آئندہ 24 گھنٹوں کے دوران مری، گلیات، خیبرپختونخوا، کشمیر اور بلوچستان کے بالائی علاقوں میں مزید بارش اور برفباری کا امکان ہے۔
