فون پانی سے گیلا ہوجانے پر اسے بغیر پکے ہوئے چاولوں کے پیالے یا تھیلے میں ڈال کر محفوظ رکھنا ایک ایسا ٹوٹکا ہے جس پر برسوں سے عمل کیا جا رہا ہے جس کی منطق یہ ہے کہ چاول فون سے اضافی پانی جذب کر لیتا ہے لیکن آئی فون بنانے والی کمپنی ایپل اپنے گاہکوں کو ایسا کرنے سے منع کرتی ہے۔
کمپنی کا کہنا ہے کہ اپنے گیلے آئی فون کو چاول میں مت ڈالیں کیوں کہ اس مقبول طریقہ علاج سے چاول کے چھوٹے ذرات آئی فون کو نقصان پہنچا سکتے ہیں اور فائدے کے بجائے الٹا نقصان ہوسکتا ہے۔
مزید پڑھیں
ایپل نے دیگر مستعمل طریقہ کار سے بھی گریز کا مشورہ دیا ہے جن میں فون کو خشک کرنے کے لیے بیرونی حرارت کا ذریعے استعمال کرنا یا روئی داخل کرکے کنیکٹر صاف کرنا بھی شامل ہیں۔
چاول کے حوالے سے کمپنی کی وارننگ دیگر مرمت کرنے والے ماہرین کے ساتھ مطابقت رکھتی ہے جنہوں نے پایا ہے کہ چاول والا ٹوٹک آئی فون کو کاؤنٹر پر رکھ کر خشک ہونے کے لیے چھوڑدینےکے مقابلے میں زیادہ سست روی سے کام کرتا ہے۔ ایسے میں وقت کی اہمیت بہت زیادہ ہوتی ہے کیوں کہ سب سے اہم چیز پانی کو فون میں داخل ہوکر الیکٹرانکس کو نقصان پہنچانے سے روکنا ہے۔
فون گیلا ہوجانے پر کمپنی کیا حل بتاتی ہے؟
چاول کا سہارا لینے کے بجائے ایپل صارفین کو متبادل حل فراہم کرتا ہے۔ اگر آپ کا آئی فون یا چارجنگ کنیکٹر گیلا ہے تو (بعد کی صورت میں) ایک الرٹ ظاہر ہو گا اور چارجنگ کو غیر فعال کر دے گا۔ ایسی صورت میں اپنے آئی فون سے کیبل کو ان پلگ کریں اور کیبل کے دوسرے سرے کو پاور اڈاپٹر یا لوازمات سے ان پلگ کریں۔ کیبل کو دوبارہ نہ لگائیں جب تک کہ آپ کا آئی فون اور کیبل مکمل طور پر خشک نہ ہوجائے۔
اضافی مائع کو ہٹانے کے لیے کنیکٹر کو نیچے کی طرف رکھتے ہوئے اپنے ہاتھ سے اپنے آئی فون کو آہستہ سے تھپتھپائیں۔ اپنے آئی فون کو ہوا کے بہاؤ کے ساتھ خشک جگہ پر چھوڑ دیں۔
کم از کم 30 منٹ کے بعد لائٹننگ یا USB-C کیبل سے چارج کرنے یا کسی لوازمات کو جوڑنے کی کوشش کریں۔
اگر آپ دوبارہ الرٹ دیکھتے ہیں تو کنیکٹر میں یا آپ کی کیبل کے پنوں کے نیچے اب بھی مائع موجود ہے۔ اپنے آئی فون کو خشک جگہ پر ایک دن تک کچھ ہوا کے بہاؤ کے ساتھ چھوڑ دیں۔ آپ اس پورے عرصے میں کسی لوازمات کو چارج کرنے یا منسلک کرنے کی دوبارہ کوشش کر سکتے ہیں۔ اسے مکمل طور پر خشک ہونے میں 24 گھنٹے لگ سکتے ہیں۔
اگر آپ کا فون خشک ہو گیا ہے لیکن پھر بھی چارج نہیں ہو رہا ہے تو اڈاپٹر سے کیبل کو ان پلگ کریں اور اڈاپٹر کو دیوار سے ان پلگ کریں (اگر ممکن ہو) اور پھر انہیں دوبارہ جوڑیں۔
’طبیعت زیادہ خراب ہو تو۔۔۔‘
کمپنی کا کہنا ہے کہ اگر یہ مشورہ کام نہیں کرتا ہے تو پھر بہتر ہے کہ کسی ریپیئر ایکسبرٹ سے رجوع کریں لیکن ہر صورت میں چاول کو فون کی پہنچ سے دور رکھیں۔