قومی اسمبلی میں نو منتخب ارکان کے لیے سہولت کاری سینٹر قائم

قومی اسمبلی سیکریٹیریٹ میں نو منتخب ممبران قومی اسمبلی کے لیے سہولت کاری سینٹر قائم کردیا گیا ہے۔

ترجمان قومی اسمبلی کے مطابق قومی اسمبلی سیکریٹیریٹ میں نو منتخب ارکان قومی اسمبلی کی سہولت کے لیے کمیٹی روم نمبر 2 میں سہولت کاری سینٹر قائم کیا گیا ہے۔

سہولت کاری سینٹر میں نو منتخب معزز ارکان قومی اسمبلی کی رجسٹریشن کے لیے کارڈز اور دیگر ضروری دستاویزات کے لیے تصاویر بنائی جائیں گی۔

ترجمان قومی اسمبلی کا کہنا ہے کہ سہولت کاری سینٹر 22 فروری سے قومی اسمبلی کے افتتاحی اجلاس تک نو منتخب ممبران قومی اسمبلی کی رجسٹریشن کے لیے خدمات سر انجام دیتا رہے گا، یہ مرکز صبح 10 بجے سے سہ پہر 3 بجے تک کھلا رہے گا۔

قومی اسمبلی سیکریٹیریٹ نے نو منتخب ارکان اسمبلی سے درخواست کی ہے کہ وہ رجسٹریشن کے سلسلے میں کسی دشواری سے بچنے کے لیے 22 فروری سے اپنی رجسٹریشن کے لیے سہولت کاری سینٹر تشریف لائیں۔

نو منتخب ارکان اسمبلی کو رجسٹریشن کے لیے شناختی کارڈ اور دیگر ضروری دستاویزات ساتھ لے کر سہولت کاری سینٹر آنے کو کہا گیا ہے۔