بے ایمانی ظاہر ہوچکی، الیکشن کے نتائج میں ٹیمپرنگ نہ کی جائے، شعیب شاہین

پاکستان تحریک انصاف کے سینیئر رہنما شعیب شاہین نے کہا ہے کہ دنیا کا کوئی ملک ایسا نہیں جہاں پر الیکشن کے روز انٹرنیٹ بند کر دیا جائے۔

اسلام آباد میں میڈیا سے گفتگو کرتے ہوئے شعیب شاہین نے کہاکہ الیکشن کے نتائج میں فارم 45 کی اہمیت ہوتی ہے، کیونکہ فارم 47 تو ایک سٹیٹمنٹ ہوتی ہے۔

انہوں نے کہاکہ این اے 47 میں آر او نے فارم 45 کے برخلاف نتیجہ دیا، اب رزلٹ میں ٹیمپرنگ نہ کی جائے کیونکہ بے ایمانی پہلے ہی ظاہر ہوچکی ہے۔

واضح رہے کہ 8 فروری کو ملک بھر میں ہونے والے عام انتخابات کے نتائج پر پی ٹی آئی سمیت دیگر جماعتوں نے تحفظات کا اظہار کیا ہے۔

پاکستان تحریک انصاف کا دعویٰ ہے کہ وہ 180 سے زیادہ نشستیں جیت چکی تھی تاہم دھاندلی سے اسے 92 نشستوں تک محدود کیا گیا ہے۔

پاکستان تحریک انصاف کی درخواست پر اسلام آباد ہائیکورٹ نے وفاقی دارالحکومت کی تینوں نشستوں پر مسلم لیگ ن کے امیدواروں کی کامیابی کا نوٹیفکیشن روک دیا تھا، تاہم اب عدالت العالیہ نے وفاقی دارالحکومت کے 3 حلقوں کی کامیابی کے نوٹیفکیشن الیکشن کمیشن کے فیصلے سے مشروط کردیے ہیں۔