ایک سے زائد نشستیں جیتنے والے امیدواروں کے لیے الیکشن کمیشن کی ضروری ہدایت

پاکستان الیکشن کمیشن نے اعلان کیا ہے کہ ایک سے زائد نشستوں پر کامیاب ہونے والے تمام امیدوار اضافی نشستوں سے دستبرداری کی درخواست کمیشن میں جمع کروادیں بصورت دیگر اس نشست کے علاوہ تمام خالی تصور ہوں گی جس پر امیدوار سب سے آخر میں کامیاب قرار پایا ہوگا۔

الیکشن کمیشن کی پریس ریلیز کے مطابق تمام کامیاب امیدواران جو 2 یا اس سے زیادہ نشستوں پر کامیاب قرار پائے ہیں کے لیے لازم ہے کہ وہ کوئی بھی ایک نشست اپنے پاس رکھ سکتے ہیں لہذا آئین کے آرٹیکل (3)223 کے تحت کسی بھی اسمبلی کی نشست لینے سے قبل ما سوائے ایک نشست کے باقی تمام نشستوں سے استعفیٰ دینے کے حوالے سے چیف الیکشن کمشنر، الیکشن کمیشن پاکستان سیکریٹریٹ اسلام آباد یا صوبائی الیکشن کمشنر پنجاب، سندھ، خیبر پختونحوا اور بلوچستان کے دفتر میں جمع کروائی جاسکتی ہے۔

پریس ریلیز میں مزید کہا گیا کہ کامیاب امید وار بذات خود یا بذریعہ اپنے مجاز نمائندے جس کی تصدیق اوتھ کمشنر کی طرف سے کی گئی ہو درخواست جمع کروادیں۔

الیکشن کمیشن کا مزید کہنا تھا کہ بصورت دیگر آرٹیکل (2) 223 کے تحت 30 دن گزرنے کے بعد تمام نشستیں خالی تصور کی جائیں گی ماسوائے اس نشست کے جس پر امید وار سب سے آخر پر کامیاب قرار پایا ہے۔