صحافی و یوٹیوبر عمران ریاض خان کو گرفتاری کے بعد لاہور کی ضلع کچہری میں پیش کر دیا گیا، عمران ریاض خان کو جوڈیشل مجسٹریٹ عمران عابد کے روبرو پیش کیا گیا۔ عمران ریاض نے ایک گھنٹہ عدالت کے روبرو دلائل دیے۔
تفصیلات کے مطابق عمران ریاض کی گرفتاری اینٹی کرپشن نے ڈالی ہے، عمران ریاض اور انکے والد پر تھرابی جھیل کا ٹھیکہ اونے پونے داموں لینے کا الزام ہے۔ عمران ریاض نے عدالت میں موقف اپناتے ہوئے کہا کہ جس ٹھیکے کا کہہ رہے ہیں کہ اونے پونے داموں لیا جھوٹ بول رہے ہیں۔ تھرابی جھیل کا گزشتہ ٹھیکہ 1 کروڑ 10 لاکھ کا تھا۔ لیکن ہم نے یہ ٹھیکہ 4 کروڑ سے زائد کا لیا۔
اس سے قبل معروف یوٹیوبر و صحافی عمران ریاض خان کو نامعلوم افراد کی جانب سے ایک بار پھر گرفتار کیا گیا، ذرائع کے مطابق عمران ریاض کو ان کے گھر سے گرفتار کیا گیا ہے۔
عمران ریاض خان کے بھائی یوسف خان نے ان کی گرفتاری کی تصدیق کرتے ہوئے کہا کہ لاہور ڈیفنس روڈ پر واقع سوسائٹی میں گھر سے نامعلوم مسلح افراد نے حراست میں لیا اور اپنے ہمراہ لے کر روانہ ہوگئے۔
مزید پڑھیں
عمران ریاض کی گرفتاری کے حوالے سے سامنے آنے والی ویڈیو کے مطابق کارروائی میں 4 گاڑیاں شامل تھیں۔ بھائی یوسف کا کہنا تھا کہ 15 سے زائد گاڑیوں پر سادہ کپڑوں میں ملبوس افراد گھر کے اندر گھسے اور عمران ریاض کو گرفتار کرکے لے گئے۔
یوسف خان کے مطابق نا معلوم افراد گھر سے لیپ ٹاپ سمیت دیگر سامان بھی ساتھ لے گئے، اور گرفتاری کی وجہ نہیں بتائی۔
خیال رہے کہ اس سے قبل بھی عمران ریاض خان متعدد بار گرفتار ہوچکے ہیں جبکہ وہ ایک لمبے عرصے کے لیے لاپتہ بھی رہے ہیں، تاہم اب وہ دوبارہ صحافت میں سرگرم نظر آرہے تھے۔
واضح رہے کہ ایف آئی اے نے ججز کے خلاف سوشل میڈیا مہم پر صحافی اور اینکر پرسن عمران ریاض اور اسد طور کو نوٹسز جاری کرتے ہوئے آج طلب کر رکھا ہے۔
اسد طور کو سائبر کرائم اسلام آباد جبکہ عمران ریاض کو سائبر کرائم لاہور میں آج دوپہرکو پیش ہونے کا حکم دیا گیا تھا۔
عمران ریاض خان کب رہا ہوئے تھے؟
اینکر عمران ریاض خان کو 11مئی کو سیالکوٹ ایئرپورٹ سے پولیس نے گرفتار کیا اور ایک دن بعد رہا کر دیا جس کے بعد عمران ریاض لاپتہ ہوگئے۔ 4 مہینے سے زائد عرصہ تک اینکر عمران ریاض لاپتہ رہے۔
چیف جسٹس لاہور ہائیکورٹ نےعمران ریاض کی بازیابی کے لیے 26 ستمبر تک مہلت دیتے ہوئے کہا تھا کہ عمران ریاض کی بازیابی کے لیے یہ آخری مہلت ہے۔ آپ نےعمران ریاض کو پیش نہ کیا تو حکم جاری کریں گے۔ 26 ستمبرکا سورج طلوع ہونے میں ابھی ایک دن باقی ہی تھا لیکن عمران ریاض گھر پہنچ گئے تھے۔
عمران ریاض 25 ستمبر کی صبح 5بجے لاہور میں اپنے ملت کالونی والے گھر پہنچے۔ وی نیوز سے بات کرتے ہوئے عمران ریاض خان کے اہل خانہ نے بتایا تھا کہ سیالکوٹ پولیس کے 3 ڈالے صبح 5 بجے ان کے گھر کے باہر آئے، ایک ڈالا جس میں عمران ریاض تھے، گھر کے سامنے رکا۔ ڈی ایس پی رینک کا افسر گاڑی سے اترا، اس نے عمران ریاض کو باہر نکالا اور فیملی کے حوالے کرتے ہوئے حوالگی پیپر پر عمران ریاض کے بھائی سے دستخط کروائے۔ انہوں نے حوالگی کے ساتھ عمران ریاض کی فیملی کے ہمراہ کچھ تصاویر بنوائیں اور واپس چلے گئے۔
