پاکستان کے سابق کپتان اظہر علی نے لاہور قلندرز کے کپتان شاہین شاہ آفریدی کی کپتانی پر سوالیہ نشان اُٹھاتے ہوئے کہا ہے کہ افغان لیگ اسپنر راشد خان کی لاہور قلندرز ٹیم میں عدم موجودگی کی وجہ سے شاہین آفریدی کی کپتانی بے نقاب ہو گئی ہے۔
نجی سپورٹس چینل پر پاکستان سپر لیگ (پی ایس ایل) کے حوالے سے گفتگو کرتے ہوئے اظہر علی نے کہا کہ راشد خان کی غیرموجودگی کے بعد لاہور قلندرز کی بولنگ اور شاہین آفریدی کی کپتانی دونوں ہی ایکسپوز ہو چکے ہیں کیونکہ مڈل اوورز میں انہیں رنز روکنے میں مشکلات کا سامنا ہے۔
اظہر علی نے کہا کہ مجھے کہا گیا، راشد خان کے نہ ہونے پر زیادہ بات نہیں کرنی چاہیے مگر اب پتا لگ رہا ہے کہ میچ کے دوران مڈل اوورز میں راشد خان کتنے مفید تھے۔
ان کا مزید کہنا تھا کہ ملتان سلطانز کے خلاف میچ کے دوران افتخار احمد جب نئی بال کا سامنا کرنے آئے تو بولرز نے ان کو ٹانگوں پر بالز کروائیں جبکہ فائن لیگ کا فیلڈر اوپر تھا جس کی وجہ سے ٹیم نے رنز لیک کیے، بولرز اور کپتان کے درمیان کوئی ہم آہنگی دیکھنے میں نہیں آئی۔
Azhar Ali:
Shaheen Afridi is exposed in absence of Rashid Khan pic.twitter.com/Obzb9bFz3T— 𝗕𝗮𝗯𝗮𝗿 Khan (@Babaristic) February 22, 2024
اظہر علی کے مطابق ٹیم سے جب کوئی اہم کھلاڑی چلا جاتا ہے تو اس کے بعد محسوس ہوتا ہے کہ کپتانی کرنا کتنا مشکل ہے، یہی وجہ ہے کہ اس مشکل صورتحال میں شاہین آفریدی کی کپتانی بے نقاب ہوگئی۔
واضح رہے کہ 2 مرتبہ کی دفاعی چیمپئن ٹیم لاہور قلندرز اب تک ایک بھی میچ جیتنے میں ناکام رہی۔
