افغان شہری کا پاکستانی شناختی کارڈ بنوانے میں ملوث سہولت کار گرفتار

چترال میں پولیس نے افغان شہری کے لیے پاکستانی شناختی کارڈ بنوانے میں ملوث سہولت کار کو گرفتار کیا ہے۔

تفصیلات کے مطابق، چترال کے نادرا آفس دروش کے اسسٹنٹ ڈائریکٹر نے پولیس کو درخواست دی تھی کہ محمد یوسف ولد جان ایک افغان شہری شیر حسن کو لے کر نادرا آفس گیا اور خود کو اس کا والد ظاہر کرکے اس کا شناختی کارڈ بنوایا تھا۔

ملزم محمد یوسف نے اپنے بیان حلفی میں اپنے جرم کا اعتراف کیا ہے اور بتایا ہے کہ اس نے افغان شہری کے فارم پر انگوٹھا لگایا اور یونین کونسل سے اس کا پیدائش کا سرٹیفیکیٹ بھی بنوایا۔

ملز کا کہنا ہے کہ وہ غریب شخص ہے اور یہ کام علی جان ولد محمد جان سکنہ ارندو گول کے کہنے پر اس نے 15 ہزار روپے عوض کیا لہٰذا علی جان کو بھی گرفتار کیا جائے۔

پولیس نے ملزم یوسف اور افغان شہری کو گرفتار کرکے مزید کارروائی کا آغاز کر دیا ہے۔

واضح رہے کہ گزشتہ ماہ بھی چترال میں غیر قانونی طور پر کارڈ بنانے میں ملوث 4 افراد کے خلاف مقدمات درج کیے گئے تھے اور اب وہ پولیس کی حراست میں ہیں۔