وفاقی سیکرٹری صحت افتخار علی شالوانی نے وفاقی دارالحکومت میں پولیو کے قطرے پلانے کی سرگرمیوں کا جائزہ لیا اور پولیو ٹیموں سے ملاقات کی جہاں انہیں ملک بھر میں جاری پولیو ویکسینیشن مہم کے پہلے روز کی سرگرمیوں کے بارے میں بریفنگ دی گئی۔
مزید پڑھیں
سیکرٹری صحت افتخار علی شالوانی نے ضلعی انتظامیہ کے عہدیداروں اور پولیو پروگرام این ای او سی کے کوآرڈینیٹر ڈاکٹر شہزاد بیگ کی سینیئر قیادت کے ہمراہ یونین کونسل شاہ اللہ دتہ میں کمیونٹی ہیلتھ سینٹر کا دورہ کیا اور اسے پولیو ویکسین کی مناسب فراہمی، تربیت یافتہ فکسڈ ٹیموں اور انتظامی معاون عملے سے لیس پایا۔
انہوں نے فیلڈ میں پولیو کے قطرے پلانے والوں سے بھی ملاقات کی اور اس بات پر اطمینان کا اظہار کیا کہ وہ گھر گھر جا کر بچوں کو پولیو کے قطرے پلا رہے ہیں۔
پولیو کے قطرے پلانے والوں کے ساتھ اپنی بات چیت میں سیکرٹری شالوانی نے پاکستان کی آنے والی نسلوں کو پولیو سے بچانے کے لیے ان کی محنت اور لگن کو سراہا اور ان کی حوصلہ افزائی کی کہ وہ اسی جوش و خروش کے ساتھ اپنا مشن جاری رکھیں۔
اپنے دورے کے دوران سیکرٹری صحت نے یوسی رورل کے علاقے ڈھوکی عباسیاں کے علاقے زم زم پلازہ میں ٹرانزٹ ویکسی نیشن ٹیم کا بھی جائزہ لیا اور وہاں اس ٹیم کے ساتھ وقت گزارا جو چلتے پھرتے بچوں کو حفاظتی قطرے پلانے میں مصروف تھی۔
سیکریٹری صحت نے کہا کہ کئی دہائیوں سے پولیو ہمارے بچوں کے لیے مسلسل خطرہ بنا ہوا ہے، زندگیاں تباہ کر رہا ہے اور انہیں مفلوج کر رہا ہے۔ ہم اس بیماری کی ملک میں موجودگی کے خاتمے کے لیے بھرپور کردار ادا کریں گے۔
انہوں نے مزید کہا کہ پاکستان میں گزشتہ سال پولیو کے صرف 6 کیسز رپورٹ ہوئے اور وہ پہلے سے کہیں زیادہ پولیو کے خاتمے کے قریب ہیں اور اس آخری مرحلے میں پہلے سے کئی زیادہ کوششوں کی ضرورت ہے۔
انہوں نے کہا کہ پولیو کا خاتمہ حکومت پاکستان کی اولین ترجیح ہے اور رہے گی، ’میں ذاتی طور پر ملک کے مختلف حصوں میں اس مہم کی نگرانی کر رہا ہوں تاکہ ٹیموں کے ساتھ علاقوں کا دورہ کر کے خود جائزہ لے سکوں۔
وزارت صحت رواں ہفتے ملک بھر میں 5 سال سے کم عمر کے 4 کروڑ 58 لاکھ سے زیادہ بچوں کو پولیو کے قطرے پلانے کے لیے رواں ہفتے ملک بھر میں پولیو کے قطرے پلانے کا دوسرا پروگرام منعقد کر رہی ہے۔ یہ مہم 9 مارچ تک جاری رہے گی۔
