بالی وڈ کے معروف اداکار اور پروڈیوسر عامر خان نے اپنی حالیہ فلم ‘لال سنگھ چڈھا’ کے حوالے سے مزاح کے انداز میں تبصرہ کرتے ہوئے کہا ہے کہ انہیں اس فلم کی ناکامی پر افسوس تو ہوا ہے لیکن ’طویل عرصے بعد میری فلم نہیں چلی، جس کی وجہ سے میرے گھر والے اور دوست مجھ سے پوچھنے آئے کہ کیا میں ٹھیک ہوں؟ میں نے محسوس کیا کہ مجھے فلاپ فلم کے بعد بہت پیار مل رہا ہے۔‘
ادویت چندن کی ہدایت کاری میں بننے والی، بالی وڈ اداکار اور پروڈیوسر عامر خان کی فلم ’لال سنگھ چڈھا‘ مداحوں کے دل میں جگہ بنانے میں ناکام رہی، باکس آفس پر بھی اس فلم نے مایوس کن کارکردگی دکھائی۔
مزید پڑھیں
اے بی پی آئیڈیاز آف انڈیا سمٹ سے خطاب کرتے ہوئے عامر خان نے کہا کہ ‘یہ میرے دل کے قریب فلم ہے۔‘ انہوں نے فلم میں شامل ٹیم کی اجتماعی لگن کو تسلیم کرتے ہوئے تبصرہ کیا کہ ’ادویت، کرینہ سمیت پوری کاسٹ اور عملے نے سخت محنت کی اور یہ اچھا نہیں ہوا۔‘
فلم کی ناکامی پر عامر خان کو کیا سبق ملا؟
فلم کی ناکامی کے بعد کے حالات پر تبصرہ کرتے ہوئے عامر خان نے کہا کہ ‘ایک طویل عرصے کے بعد میری فلم نہیں چلی، اس لیے گھر والے اور دوست مجھ سے پوچھنے آتے ہیں کہ کیا میں ٹھیک ہوں، مجھے سبق ملا کہ مجھے ایک فلاپ فلم کے بعد بہت پیار مل رہا ہے۔‘
فلم کی خامیوں میں اپنے کردار کو تسلیم کرتے ہوئے عامر خان نے کہا کہ ‘میں نے اس فلم میں کئی سطحوں پر بہت سی غلطیاں کیں،مجھے تکلیف ہوئی کہ فلم نہیں چلی، اس غم کو بھلانے میں وقت لگا۔‘
عامر خان نے اس موقع پر سامعین کو تفریح فراہم کرنے کے بنیادی مقصد پر زور دیا اور کہا ’لوگ ایک مزے دار کہانی کے لیے تھیٹرز میں آتے ہیں، لوگوں کو تفریح کے مواقع زیادہ ملنے چاہیے۔‘
