پاک فوج کا لواری ٹنل، کالام، چترال اور مالم جبہ میں ریسکیو آپریشن جاری

پاک فوج کی جانب سے لواری ٹنل، کالام، چترال اور مالم جبہ کے گرد و نواح میں شدید برفباری کے بعد ریسکیو آپریشن جاری ہے۔ پاک فوج کی ریسکیو ٹیمیں رات بھر متحرک رہیں اور سڑکوں سے برف ہٹانے کے ساتھ ساتھ پھنسے ہوئے مسافروں کو بھی ریسکیو کر رہی ہیں۔

پاک فوج کی جانب سے برفباری کے علاقوں میں پھنسے مسافروں کو ریسکیو کیا جا رہا ہے اور قریب میں واقع آرمی کیمپوں سے کھانے پینے کی اشیا اور ادویات فراہم کی جا رہی ہے۔گذشتہ روز سے پاک فوج کی ریسکیو ٹیمیں شدید برفباری سے متاثرہ سڑکوں پر آمدورفت بحال کرنے کے لیے متحرک ہیں۔

پاک فوج، ضلعی انتظامیہ کے ساتھ بھاری مشینری کے ساتھ ہنگامی بنیادوں پر کام کر رہی ہے۔ پاک فوج کی جانب سے شدید برف باری سے متاثرہ تمام سڑکوں پر آمدورفت کی مکمل بحالی تک کام جاری رہے گا۔