بجلی چوری کے خلاف جاری مہم کے دوران اسلام آباد الیکٹرک سپلائی کمپنی (آئیسکو) نے بجلی چوری میں ملوث افراد کے خلاف مجموعی طور پر 53 کروڑ 92 لاکھ 30 ہزار جرمانے عائد کیے ہیں۔
مزید پڑھیں
آئیسکو کی جانب سے جاری تفصیلات کے مطابق آئیسکو کے سربراہ ڈاکٹر محمد امجد خان کی قیادت میں 7 ستمبر 2023 کو شروع کی گئی اس مہم کو حکومت اور وزارت توانائی دونوں کی حمایت حاصل ہے۔
سرکاری اداروں، صوبائی انتظامیہ اور قانون نافذ کرنے والے اداروں کی غیر متزلزل حمایت کی بدولت آئیسکو کی جانب سے تعینات کی گئی سراغ رساں ٹیموں نے اپنے آپریشنل سرکلز میں بجلی چوری کی روک تھام میں نمایاں پیش رفت کی ہے۔
آئیسکو کے مطابق صرف فروری 2024 میں ان چوکس ٹیموں نے 311 بجلی چوروں کو پکڑا، جس کے نتیجے میں 22.9 ملین جرمانے کیے گئے۔ مزید برآں، بجلی چوری میں ملوث 28 افراد کو پولیس نے فوری طور پر گرفتار کر لیا۔
ڈاکٹر محمد امجد خان نے کہا کہ جاری مہم سے بجلی چوری کے واقعات اور کمپنی لائن لاسز میں کمی لانے میں مدد ملی ہے اور اس کے ساتھ ساتھ محصولات میں خاطر خواہ اضافہ ہوا ہے۔
انہوں نے بجلی چوری کے خلاف کارروائیوں میں کسی قسم کا سمجھوتا نہ کرنے کے عزم کا اعادہ کرتے ہوئے اس لعنت کے خاتمے کے لیے آئیسکو کے پختہ عزم کا بھی اعادہ کیا۔ کمیونٹی کی شرکت کی حوصلہ افزائی کرتے ہوئے انہوں نے صارفین پر زور دیا کہ وہ بجلی چوری کے کسی بھی واقعے کی اطلاع متعلقہ حکام کو ہیلپ لائن نمبر 118 کے ذریعے فوری طور پر دیں۔
