سندھ کے علاقے میرپور خاص میں بجلی کی چوری میں ملوث عناصر کے خلاف بڑے پیمانے پر کریک ڈاؤن ہوا ہے اور اس دوران سہولت کاری کرنے والے حیسکو کے 5 اہلکاروں سمیت 6 ملزمان کو گرفتار کر لیا گیا۔
بجلی چوروں کے خلاف کارروائیاں ایف آئی اے کمپوزیٹ سرکل میر پور خاص کی جانب سے کی گئی ہیں۔
مزید پڑھیں
ڈائریکٹر حیدرآباد زون عبدالحمید بھٹو کی ہدایت پر ڈپٹی ڈائریکٹر کمپوزیٹ سرکل میرپور خاص محمد راشد بھٹی کی زیر نگرانی چھاپہ مار کارروائیاں عمل میں لائی گئیں۔
کارروائی کے دوران معلوم ہوا کہ ملزمان حیسکو ملازمین کی ملی بھگت سے ڈائریکٹ لائن سے بجلی چوری کر رہے تھے۔ گرفتار ملزمان میں محمد اسرار، نند لال، سعید، رمیش، جاوید حیات اور اعجاز شامل ہیں۔
بجلی چوری میں ملوث حیسکو کے اہلکار سب ڈویژن ڈگری میں تعینات تھے۔
گرفتار ملزمان بطور لائن مین، میٹر ریڈر اور لائن سپرنٹنڈنٹ ڈیوٹی سر انجام دے رہے تھے۔
بجلی چوری سے خزانے کو 10 لاکھ روپے سے زیادہ کا نقصان
ملزمان نے مختلف دکانوں پر بوگس بجلی میٹرز نصب کیے ہوئے تھے۔ ٹیکنیکل رپورٹس کے مطابق ملزمان نے مختلف دکانوں پر 15000 یونٹس بجلی چوری کی۔
رپورٹ کے مطابق بجلی چوری سے قومی خزانے کو مجموعی طور پر 10 لاکھ سے زیادہ کا نقصان پہنچا۔
کارروائی کے دوران غیر قانونی کنکشنز کو حیسکو حکام نے منقطع کر دیا۔ جبکہ غیر قانونی کنکشنز میں استعمال ہونے والی تاروں اور دیگر آلات کو قبضے میں لے لیا گیا۔
ملزمان کو گرفتار کرکے تفتیش کا آغاز کر دیا گیا، جبکہ دیگر کی گرفتاری کے لیے چھاپے مارے جا رہے ہیں۔
