بلوچستان کے عوام مشکل کی گھڑی میں خود کو تنہا نہ سمجھیں، وزیراعلیٰ سرفراز بگٹی

وزیراعلیٰ بلوچستان میر سرفراز بگٹی نے کہا ہے کہ صوبے کے عوام کسی بھی مصبیت کی گھڑی میں خود کو تنہا محسوس نہ کریں، حکومت عوام کے ساتھ کھڑی ہے۔

نومنتخب وزیراعلیٰ سرفراز بگٹی نے آج گوادر کا دورہ کیا اور بارشوں سے ہونے والے نقصانات کا جائزہ لیا۔

انہوں نے کہاکہ کل تک گوادر شہرسے پانی کی نکاسی کا عمل مکمل ہوجائے گا۔

وزیراعلیٰ نے کہاکہ پاک فوج کے جوانوں، پی ڈی ایم اے کے عملے سمیت دیگر اداروں نے مشکل کی اس گھڑی میں اپنے تمام وسائل بروئے کار لاتے ہوئے اقدامات کیے ہیں۔

انہوں نے کہاکہ اہلیان گوادر نے اس مشکل وقت میں امدادی اداروں سے جس طرح تعاون کیا وہ قابل ستائش ہے۔

سرفراز بگٹی کا کہنا تھا کہ بارشوں اور سیلابی پانی سے سینکڑوں گھروں کو نقصان پہنچا۔ ہم نے نقصانات کے تعین کے لیے کمیٹی تشکیل دے دی ہے جو20 روز کے اندر مکمل رپورٹ پیش کرے گی۔

واضح رہے کہ سرفراز بگٹی نے گزشتہ روز وزیراعلیٰ کا حلف اٹھایا تھا اور انہوں نے پہلا دورہ گوادر کا کیا ہے۔