خیبر پختونخوا میں گزشتہ 5 روز کے دوران جاری بارشوں کے نتیجے میں حادثات کے باعث 35 افراد جاں بحق جبکہ 43 افراد زخمی ہوگئے۔
مزید پڑھیں
قدرتی آفات سے نمٹنے کے صوبائی ادارے (پی ڈی ایم اے) کے مطابق، بارشوں کے باعث 346 گھروں کو جزوی جبکہ 46 گھروں کو مکمل نقصان پہنچا۔ پی ڈی ایم اے نے کہا ہے کہ وزیراعلیٰ کی ہدایت پر متاثرین میں امدادی سامان تقسیم کیا جارہا ہے۔
وزیراعلیٰ خیبر پختونخوا علی امین گنڈا پور نے جاں بحق افراد کے ورثا اور زخمیوں کو فوری طور پر ریلیف اور امدادی چیک مہیا کرنے کی ہدایت کی تھی۔
ڈی جی پی ڈی ایم اے نے کہا ہے کہ وزیراعلیٰ علی امین گنڈا پور کی خصوصی ہدایت پر بارشوں اور لینڈ سلائیڈنگ سے متاثرہ افراد میں خوراک اور امدادی سامان تقسیم کر دیا گیا ہے۔
اس سلسلے میں چارسدہ، لوئر دیر، اپر دیر، ملا کنڈ، مہمند، بنوں، خیبر، باجوڑ، نوشہرہ، پشاور کے متاثرین میں سامان تقسیم کیا گیا ہے۔ امدادی سامان میں رضائیاں، ٹینٹ، خیمے، کنستر، گیس سلنڈر، واٹر کولر، توشک، کمبل، کچن سیٹ، حفظان صحت کی کٹ، ڈگنٹی کٹس، پلاسٹک میٹس، سینڈ بیگز اور ترپال سمیت دیگر سامان بھی تقسیم کیا گیا۔
وزیراعلیٰ خیبرپختونخوا علی امین خان گنڈا پور نے حکام کو ہدایت کی ہے کہ بند راستوں کو کھولنے کے لیے فوری اقدامات کئے جائیں۔ انہوں نے کہا ہے کہ متاثرہ افراد کو مشکل کی گھڑی میں تنہا نہیں چھوڑیں گے۔
وزیراعلیٰ نے پی ڈی ایم اے، ضلعی انتظامیہ، ریسکیو1122 سمیت تمام متعلقہ اداروں کو مکمل الرٹ رہنے کی ہدایات جاری کی ہیں اور کہا ہے کہ عوام کو بروقت ریلیف پہچانے کے لیے تمام تر وسائل بروئے کار لائے جائیں۔
