وزیراعلیٰ بلوچستان میر سرفراز احمد بگٹی نے کہا ہے کہ گوادر میں بارشوں سے ہونے والے نقصانات کا ازالہ کیا جائے گا، بحالی کے عمل میں وفاقی حکومت نے بھی بھرپور تعاون کا یقین دلایا ہے، معمولات زندگی کی بحالی تک ہنگامی اقدامات جاری رہیں گے۔
وزیرِاعظم پاکستان شہباز شریف کے ہمراہ گودار کے دورہ کے موقع پر دی جانے والی بریفنگ اور متاثرین سے گفتگو کرتے ہوئے وزیر اعلیٰ بلوچستان نے کہاکہ گوادر کے متاثرین ہماری توجہ کا مرکز ہیں، گودار کا دورہ کرنے اور متاثرین سے یکجہتی پر وزیر اعظم پاکستان شہباز شریف کا شکریہ ادا کرتے ہیں، امید ہے کہ وفاقی اور صوبائی حکومتیں اشتراکی اقدامات کے ذریعے متاثرین کی بحالی کے عمل کو مختصر مدت میں مکمل کریں گی۔
مزید پڑھیں
انہوں نے کہاکہ گوادر میں حالیہ طوفانی بارشوں سے بڑے پیمانے پر تباہی ہوئی، وزرات اعلیٰ کا منصب سنبھالنے کے بعد پہلی ترجیح گودار کے متاثرین کی مدد و بحالی رہی، پاکستان پیپلز پارٹی کے چیئرمین بلاول بھٹو زرداری نے بھی گوادر کے متاثرین سے یکجہتی کا اظہار کرتے ہوئے مشکل کی اس گھڑی میں صوبائی حکومت اور پارٹی کی سینیئر قیادت کو ٹھوس اقدامات اٹھانے کے لیے کہا۔
سرفراز احمد بگٹی نے کہاکہ گوادر میں غیر معمولی بارشوں کے بعد متحرک کردار ادا کرتے ہوئے پاک فوج اور سول انتظامیہ نے موثر ریسکیو کارروائیوں کے ذریعے کئی انسانی جانیں بچائیں اور لوگوں کو محفوظ مقامات پر منتقل کیا، شہری علاقوں سے بارشوں کے پانی کے اخراج اور مواصلاتی نظام کی بحالی کے لیے صوبائی حکومت کے اعلیٰ افسران کی سربراہی میں فوری ہنگامی کارروائیوں کے نتیجے میں گوادر میں معمولات زندگی بحال ہونا شروع ہوگئے ہیں اور مکمل بحالی تک ان اقدامات کا تسلسل جاری رہے گا۔
’گوادر کے متاثرین خود کو تنہا نہ سمجھیں‘
انہوں نے کہاکہ گوادر کے متاثرین خود کو تنہا نہ سمجھیں، مشکل کی اس گھڑی میں اپنے عوام کے ساتھ کھڑے ہیں، ہر متاثرہ خاندان اور آخری متاثرہ شخص کی بحالی تک چین سے نہیں بیٹھیں گے، متاثرین کی بحالی کے لیے صوبائی حکومت تمام دستیاب وسائل بروئے کار لائے گی اور گوادر کے متاثرین کو دوبارہ ان کے گھروں میں آباد کیا جائے گا۔
اس موقع پر پاکستان پیپلز پارٹی کے رکن قومی اسمبلی ملک شاہ گورگیج، پاکستان مسلم لیگ کے رکن قومی اسمبلی سردار محمد یعقوب ناصر، اسپیکر بلوچستان اسمبلی کیپٹن ریٹائرڈ عبدالخالق اچکزئی، اراکین صوبائی اسمبلی شعیب نوشیروانی، مولانا ہدایت الرحمٰن سمیت اعلیٰ صوبائی افسران بھی موجود تھے.
وزیر اعلیٰ بلوچستان سرفراز احمد بگٹی نے متاثرہ خاندانوں سے بھی ملاقات کی اور حکومت کی جانب سے جاری کارروائیوں اور اقدامات سے متعلق استفسار کیا۔
وزیراعلیٰ نے متاثرین میں روز مرہ ضروریات کی اشیا بھی تقسیم کیں۔ اس سے قبل انتظامی افسران کی جانب سے سرفراز بگٹی کو گوادر میں بارشوں سےمتاثرہ علاقوں میں ریسکیو اور بحالی کارروائیوں سے متعلق اٹھائے جانے والے اقدامات کی تازہ ترین پیشرفت سے آگاہ کیا گیا۔
