کراچی: شہری کی فائرنگ سے 2 مبینہ ڈاکو زخمی

کراچی کے علاقے ناظم آباد میں شہری کی فائرنگ سے 2 مبینہ ڈاکو زخمی ہوگئے ہیں۔

ریسکیو ذرائع کے مطابق روشنیوں کے شہر کراچی کے علاقے ناظم آباد میں میٹرک بورڈ آفس کے قریب شہری کی فائرنگ سے 2 مبینہ ڈاکو زخمی ہوگئے۔

اس حوالے سے پولیس کا کہنا ہے کہ زخمی ملزمان اپنے ساتھی کے ہمراہ نجی اسپتال پہنچے تھے، اسپتال انتظامیہ کا علاج سے انکار کے بعد زخمی ڈاکوؤں کا ساتھی فرار ہوگیا ہے۔

زخمی ڈاکوؤں کو اسپتال انتظامیہ نے ایمبولینس کے ذریعے عباسی اسپتال روانہ کیا ہے۔

پولیس کا مؤقف ہے کہ مذکورہ واقع کہاں پیش آیا اور ڈاکو کس شہری کی فائرنگ سے زخمی ہوئے ہیں، اس بابت تفصیلات جمع کی جارہی ہیں۔

یہاں یہ بات بھی قابل ذکر ہے کہ حالیہ دنوں میں روشنیوں کے شہر کراچی میں اسٹریٹ کرائم میں اضافہ دیکھنے میں آیا ہے، 2 روز قبل ڈاکوؤں کی فائرنگ سے نجی یونیورسٹی کا طالب علم جاں بحق ہوگیا تھا۔

مقتول طالب علم لاریب باڈی بلڈنگ جم سے واپس گھر آرہا تھا کہ راستے میں 2 ملزمان نے اسے روکا اور فائرنگ کی جس کے نتیجے میں ایک گولی مقتول کی آنکھ کے قریب لگی جو جان لیوا ثابت ہوئی تھی۔