سائبر کرائم پشاور نے کارروائی کرتے ہوئے آن لائن مالی فراڈ میں ملوث 2 غیرملکیوں کو گرفتار کرلیا، سائبر کرائم ٹیم نے چھاپہ مار کارروائی میں آن لائن دھوکہ دہی اور فراڈ میں ملوث نائیجرین گینگ کے 2 ملزمان کو لاہور سے گرفتار کیا۔
ترجمان ایف آئی اے کےمطابق غیر ملکی ملزمان کی شناخت اڈوگی ہینڈسم ٹچوکوو اور اکوکوو چنازا گوڈون کے نام سے ہوئی، ملزمان کو چھاپہ مار کارروائی میں لاہور سے گرفتار کیا گیا، ملزمان نے شہریوں کے ساتھ 4 کروڑ 60 لاکھ سے زائد رقم کا فراڈ کیا تھا۔
مزید پڑھیں
ترجمان کے مطابق ملزمان شہریوں کو فیس بک پر خواتین کی آئی ڈیز بنا کر اپنے جال میں پھنساتے تھے، بعد ازاں پارسل ڈیلیوری، کسٹم فیس اور دیگر کی مد میں رقم وصول کرتے تھے۔ رقم نا دینے کی صورت میں خطرناک نتائج کی دھمکیاں بھی دیتے تھے۔
ایف آئی اے کے مطابق ملزمان شہریوں کو آن لائن ملازمت کا جھانسہ دے کر فراڈ کرنے میں بھی ملوث پائے گئے، ملزمان آن لائن ملازمت کے جھانسے میں شہریوں کو بینک اکاؤنٹس کھولنے کی ترغیب دیتے تھے۔ بعد ازاں ان اکاؤنٹس کا کنٹرول خود سنبھال لیتے اور آن لائن مالی فراڈ میں استعمال کرتے۔
واضح رہے ایف آئی اے کی جانب سے تمام ملزمان کو گرفتار کرکے تفتیش کا آغاز کر دیا گیا ہے۔
