تھانہ کورال اسلام آباد کے علاقہ میں ملزمان کی گرفتاری کے لیے چھاپے کے دوران ملزمان کی فائرنگ سے شہید ہونے والے پولیس جوان شعیب افضل کے جسدِ خاکی کو نماز جنازہ کی ادائیگی کے بعد پورے اعزاز کے ساتھ آبائی گاؤں منڈی بہاؤالدین روانہ کر دیا گیا۔
اتوار کو شہید ہونے والے کانسٹیبل شعیب افضل کی نماز جنازہ پولیس لائنز میں ادا کی گئی، نماز جنازہ میں اسلام آباد سپرنٹنڈنٹ پولیس آفیسر (آئی سی سی پی او) ڈاکٹر اکبر ناصر خاں سمیت بڑی تعداد میں پولیس جوانوں، قانون نافذ کرنے والے اداروں کے افسران اور جوانوں نے شرکت کی۔
مزید پڑھیں
نماز جنازہ کے بعد ڈاکٹر اکبر ناصر نے شہید شعیب افضل کے اہل خانہ سے تعزیت کا اظہار کرتے ہوئے کہا کہ شہید شعیب افضل نے فرض کی ادائیگی کے دوران اپنی جان قربان کی۔ شہید کی قربانی ہرگز رائیگاں نہیں جائے گی۔ ان کی شہادت میں ملوث ملزمان کو ہرصورت کیفرکردار تک پہنچایاجائے گا۔
اس موقع پر آئی سی سی پی او نے شہید کے لواحقین کی ہر طرح سے بھرپورمدد فراہم کرنے کی ہدایت کی اور کہا کہ شہید شعیب افضل انتہائی نڈر اور فرض شناس تھے۔
حال ہی میں ان کی بہترین فرض شناسی پر انہیں آئی سی سی پی او کی طرف سے تعریفی سند اور انعام سے نوازا گیا تھا، شہید شعیب افضل 2019 میں بطور کانسٹیبل اسلام آباد پولیس میں بھرتی ہوئے تھے۔ شہیدکے جسدخاکی کو پورے اعزاز کے ساتھ آبائی گاؤں منڈی بہاوالدین روانہ کردیاگیا۔
اس سے قبل ترجمان اسلام آباد کیپیٹل پولیس کا کہنا تھا کہ تھانہ کورال کے علاقہ میں پولیس ٹیم نے مطلوب ملزمان کی گرفتاری کے لیے چھاپہ مارا، چھاپے کے دوران ملزمان نے پولیس ٹیم پر فائرنگ کردی، جس سے پولیس جوان محمد شعیب شدید زخمی ہوگئے جن کو اسپتال منتقل کیا گیا لیکن کو جانبر نہ ہوسکے اور زخمی کی تاب نہ لاتے ہوئے شہید ہوگئے۔