پاکستان سپر لیگ (پی ایس ایل) کے 9 ویں ایڈیشن کے میچ میں کوئٹہ گلیڈی ایٹرز نے دفاعی چیمپیئن لاہور قلندرز کو شکست دے کر ایونٹ کے پلے آف مرحلے کے لیے کوالیفائی کر لیا۔
لاہور قلندرز کی جانب سے کپتان شاہین شاہ آفریدی نے شاندار اننگزکھیلی اور 4 فلک شگاف چھکوں کی مدد سے 55 رنز بنائے۔ شاہین شاہ آفریدی نے نصف سنچری بنا کراپنی انگلی ہونٹوں پر رکھ کر جشن منایا جس پر سوشل میڈیا صارفین کی جانب سے شدید تنقید ہورہی ہے کیونکہ لاہور قلندرز اس ٹورنامنٹ میں پہلے ہی باہر ہو چکی ہے اور شاہین آفریدی کی بطور کپتان خراب کارکردگی پہلے ہی تنقید کی زد میں ہے، شائقین کی جانب سے کہا جا رہا ہے کہ اتنی خراب پرفارمنس کے باجود ایسے جشن منانا انہیں زیب نہیں دیتا۔
سماجی رابطے کی ویب سائٹ ایکس (سابقہ ٹوئٹر) پر عمران صدیق نامی صارف نے اپنی پوسٹ میں لکھا کہ ’شاہین نے 28 گیندوں پر نصف سنچری بنائی لیکن وہ ایسے جشن کیوں منا رہے ہیں‘۔
Shaheen scored a fifty on 28 balls but why is that celebration ? 🤫🤫 pic.twitter.com/bC4BCCEsoG
— ٰImran Siddique (@imransiddique89) March 10, 2024
شاہد اسلم نامی ایکس صارف نے کہا کہ شاہین شاہ آفریدی کی توجہ پرفارمنس کی بجائے فنکاری پر ہے۔
فنکاری پہ توجہ زیادہ ہے پرفامنس کی بجائے
— Shahid Aslam (@ShahidAslam87) March 10, 2024
شکیل ارشد یوسفزئی نے اپنی پوسٹ میں شاہین شاہ کو تنقید کا نشانہ بناتے ہوئے لکھا کہ ’ ان سے بس یہی حرکتیں کروالو، بچوں والی حرکتیں ہیں ساری۔ ٹیم آخری نمبر پہ ہے‘ انہوں نے شاہین شاہ آفریدی کو آڑے ہاتھوں لیتے ہوئے کہا کہ اب یہ لوگوں کو ایسے چپ کرائیں گے۔
ان سے بس یہی حرکتیں کروالوں۔۔۔ بچوں والی حرکتیں ہیں سارے۔ ٹیم آخری نمبر پہ ہے اور جناب لوگوں کو ایسے چپ کرائے گا۔
— Shakeel Arshad usfzai (@yousafzai865) March 10, 2024
عامر سہیل نے بابر اعظم کو یاد کرتے ہوئے لکھا کہ ’ ہر کوئی بابر اعظم نہیں ہوتا کہ خاموشی سے تنقید برداشت کر لے‘۔
Har koi Baber nhi Hota Jo khamoshi se Tanqeed brdasht kr Ly,,,
— Aamir Sohail (@AamirSo87095913) March 10, 2024
یاد رہے کہ لاہور اس سے قبل لاہور قلندرز کے بیٹر عبداللہ شفیق کو ایسے جشن منانے پر سابق کپتان وسیم اکرم کی جانب سے تنقید کا نشانہ بنایا گیا تھا تاہم عبداللہ شفیق نے گزشتہ روز پریس کانفرنس کرتے ہوئے وسیم اکرم کو جواب دیا اور کہا کہ سابق کپتان وسیم اکرم مجھ سے زیادہ کرکٹ کو جانتے ہیں، وہ ان کی رائے ہے، البتہ میں اتنا کہنا چاہوں گا کہ اسلام آباد یونائیٹڈ کیخلاف میچ میں میری سیلیبریشن محض ایک اتفاق تھی، جو ایک بے ساختہ ردعمل تھا۔
قبل ازیں سابق کپتان وسیم اکرم نے گزشتہ دنوں عبداللہ شفیق کو کیچ تھامنے کے بعد خاموش کروانے والی سیلبریشن پر آڑے ہاتھوں لیتے ہوئے کہا تھا کہ دورہ آسٹریلیا میں 2 کیچز ڈراپ کرکے پی ایس ایل میں ایک کیچ تھامنے کے بعد منہ پر ہاتھ رکھ کر کس کو خاموش کروارہے ہیں؟ انہوں نے کہا تھا کہ کوئی یہ بتائے 36 کیچ ڈراپ کرکے آئے ہیں، اس کاجواب کون دے گا؟ میرے خیال میں انہیں کرکٹ چھوڑ کر ڈراموں میں کام کرنا چاہیے۔
