پشاور میں رات گئے پولیس وین پر مسلحہ افراد نے حملہ کر دیا جس کے نتیجے میں 2 اہلکار جاں بحق جبکہ اے ایس آئی زخمی ہو گیا۔ پشاور پولیس نے واقعے کی تصدیق کر دی۔
ڈی ایس پی ورسک سرکل امتیاز عالم نے بتایا کہ واقعہ تھانہ مچنی گیٹ کی حدود ڈاگ لارہ کے علاقے میں پیش آیا جہاں گشت کے دوران پولیس موبائل پر شدت پسندوں نے حملہ کیا۔
مزید پڑھیں
انہوں نے بتایا کہ مسلحہ افراد کی فائرنگ سے کانسٹیبل اجمل اور سراج جاں بحق جبکہ موبائل آفیسر مظہر اے ایس آئی زخمی ہو گیا۔ جنہیں فوری طور پر اسپتال منتقل کر دیا گیا۔
امتیاز عالم نے بتایا کہ واقعے کی اطلاع ملتے ہی پولیس افسران بھاری نفری کے ہمراہ فوری موقع پر پہنچ سرچ آپریشن کا آغاز کر دیا ہے۔ تاہم آخری اطلاعات تک کوئی گرفتاری عمل میں نہیں آئی۔ پولیس کے مطابق فائرنگ کے بعد مسلحہ افراد فرار ہونے میں کامیاب ہو گئے تھے۔
