وزیراعلیٰ پنجاب مریم نواز شریف نے کہا ہے کہ اسلام پُرامن دین ہے اور مسلمان امن پر یقین رکھتے ہیں، اسلام ہی وہ دین ہے جس نے بنیادی انسانی حقوق دیے، اقوام متحدہ، او آئی سی اور دیگر عالمی تنظیموں کو اسلامو فوبیا کے خاتمے کے لیے مزید کوششوں کی ضرورت ہے۔
اسلامو فوبیا کے عالمی دن کے موقع پر وزیراعلیٰ پنجاب مریم نواز شریف نے اپنے بیان میں کہا ہے کہ اسلامو فوبیا کی وجہ سے مسلمانوں کے ساتھ ناروا اور امتیازی سلوک روا رکھا جاتا ہے، اسلامو فوبیا کی پر زور مذمت کرتی ہیں۔
مزید پڑھیں
مریم نواز شریف نے کہا کہ اسلامو فوبیا ہی ہے کہ فلسطین اور کشمیر میں معصوم مسلمانوں کو ظلم و جبر کا شکار کیا جارہا ہے، اسلامو فوبیا کی روک تھام کے لیے اسلامی دنیا کے چہرے کو مثبت انداز میں پیش کرنے کی ضرورت ہے، مسلم ممالک کو آپس کی نااتفاقی ختم کر کے اتحاد کی علامت بننا چاہیے۔
وزیراعلیٰ پنجاب نے کہا کہ اسلامی اقدار پر من وعن عمل اور ہمارا انفرادی طرزعمل اسلامو فوبیا کو مات دینے میں بہت اہم کردار ادا کر سکتا ہے، اسلامو فوبیا کے خلاف عالمی دن پر ہمیں عہد کرنا ہے کی ہم بردباری، تحمل اور اخلاق حسنہ کا دامن نہیں چھوڑیں گے۔
انہوں نے کہا کہ اسلام پُرامن دین ہے اور مسلمان امن پر یقین رکھتے ہیں، اقوام متحدہ، او آئی سی اور دیگر عالمی تنظیموں کو اسلامو فوبیا کے خاتمے کے لیے مزید کوششوں کی ضرورت ہے۔
