پاکستان کے بینکنگ شعبہ میں سب سے زیادہ معاوضہ لینے والے سی ای اوز کون ہیں؟

قومی معیشت اور کاروباری ماحول کو درپیش چیلنجز کے باوجود پاکستان میں کمرشل بینکوں کے اثاثے بڑھتے جا رہے ہیں۔ گزشتہ چند برسوں میں دیکھا گیا ہے کہ زیادہ تر بینکوں کی بیلنس شیٹس میں تاریخی اعتبار سے بلند شرح سود اور سرکاری سیکیورٹیز میں سرمایہ کاری کی وجہ سے حیران کن اضافہ دیکھنے کو ملا ہے۔

اس حوالے سے دیکھا جائے تو پاکستان کے بینکنگ سیکٹر میں سی ای اوز بھی اچھا خاصا کما رہے ہیں۔ سب سے زیادہ معاوضہ لینے والوں کی فہرست میں کون کون شامل ہیں اور کتنے کما رہے ہیں، آئیے اس پر ایک نظر ڈالتے ہیں:

مزید پڑھیں
ہاؤسنگ سوسائٹیز کی فائلوں کی خرید و فروخت کرنے والوں کے لیے بری خبر
سب سے زیادہ خوش ممالک کی فہرست جاری، پاکستان نے اس سال بھی بھارت کو پچھاڑ دیا
دُہری شہریت چھوڑ کر وزیر خزانہ بننے والے محمد اورنگزیب مستقبل میں کہاں رہنے کا ارادہ رکھتے ہیں؟
ٹیکس آمدنی بڑھانے کے لیے آئی ایم ایف نے پاکستان سے ڈو مور کا مطالبہ کردیا
پاکستان بینکنگ محتسب کی ششماہی رپورٹ جاری، کمرشل بینکوں کی کارکردگی غیر تسلی بخش قرار

جاوید اقبال، صدر اور سی ای او یو بی ایل

جاوید اقبال پاکستان کے بینکنگ شعبے میں سب سے زیادہ معاوضہ لینے والے بینکر ہیں۔ وہ یونائیٹڈ بینک لمیٹڈ کے صدر اور سی ای او کے طور پر کام کرتے ہیں۔ اس پوزیشن پر حال ہی میں انہیں ایک سال مکمل ہوا ہے۔ اگر ان کی تنخواہ کی مد میں آمدنی کو دیکھا جائے تو وہ سالانہ 386 ملین روپے کماتے ہیں جو کہ اسی بینک کے گزشتہ چیف کی سالانہ آمدن سے 97 ملین روپے زیادہ ہے۔

عرفان صدیقی، میزان بینک کے صدر اور سی ای او

میزان بینک کے صدر اور سی ای او عرفان صدیقی پاکستان کے بینکنگ سیکٹر میں سب سے زیادہ سالانہ کمانے والے افراد کی فہرست میں دوسرے نمبر پر ہیں۔ ان کی تنخواہ کی مد میں سالانہ آمدن 359 ملین روپے ہے جبکہ ان کی گزشتہ سال کی آمدن 297 ملین روپے تھی۔

محمد اورنگزیب، صدر اور سی ای او ایچ بی ایل

وفاقی وزیر خزانہ بننے سے پہلے تک محمد اورنگزیب کو مہنگے ترین بینکر کا اعزاز حاصل رہا۔ اب وہ اس فہرست میں تیسرے نمبر پر ہیں۔ سال 2023 میں تنخواہ کی مد میں انہوں نے 352 ملین روپے کمائے جو کہ سال 2022 کی نسبت 49 ملین روپے زیادہ ہیں۔ محمد اورنگزیب نے گزشتہ ہفتے بطور صدر اور سی ای او، ایچ بی ایل استعفیٰ دے دیا تھا، جس کے بعد ایچ بی ایل بورڈ آف گورنرز نے محمد ناصر سلیم کو ایچ بی ایل کا صدر اور سی ای او منتخب کیا تھا۔

عاطف باجوہ، صدر اور سی ای او بینک الفلاح

عاطف باجوہ کا شمار اعلیٰ کارکردگی کا مظاہرہ کرنے والے سی ای اوز میں ہوتا ہے۔ ان کی تنخواہ میں سال 2023 میں 28 فیصد اضافہ ہوا جو کہ 63 ملین روپے بنتے ہیں۔ سال 2022 میں ان کی سالانہ تنخواہ 225 ملین روپے تھی۔ اس حساب سے سال 2023 میں انہوں نے تنخواہ کی مد میں 288 ملین روپے کمائے۔

ریحان شیخ، صدر اور سی ای او اسٹینڈرڈ چارٹرڈ بینک

ریحان شیخ نے سال 2023 میں تنخواہ کی مد میں 258 ملین روپے حاصل کیے۔ جبکہ سال 2022 میں ان کی سالانہ آمدن 244 ملین روپے تھی۔

یوسف حسین، صدر اور سی ای او فیصل بینک

یوسف حسین پاکستان کے دوسرے سب سے بڑے اسلامی بینک کے صدر اور سی ای او ہیں، جن کی سالانہ تنخواہ 221 ملین روپے ہے۔ انہوں نے اپنے بینک سے سال 2022 میں 166 ملین روپے تنخواہ وصول کی تھی۔

منصور علی خان، صدر اور سی ای او، بینک الحبیب لمیٹڈ

منصور علی خان نے سال 2023 میں سالانہ تنخواہ کی مد میں 209 ملین روپے کمائے جبکہ سال 2022 میں انہوں نے 166 ملین روپے تنخواہ وصول کی تھی۔

ظفر مسعود، صدر اور سی ای او، بینک آف پنجاب

ظفر مسعود نے سال 2023 میں سالانہ تنخواہ کی مد میں 171 ملین روپے کمائے۔ ان کی سالانہ تنخواہ میں 10 ملین روپے کی کمی ہوئی جو کہ 2022 میں 181 ملین روپے تھی۔

عاطف بخاری، صدر اور سی ای او عسکری بینک

عاطف بخاری نے سال 2023 میں سالانہ تنخواہ کی مد میں 144 اعشاریہ 5 ملین روپے کمائے جبکہ سال 2022 میں انہوں نے بینک سے تنخواہ کی مد میں 96 ملین روپے سے زائد رقم وصول کی تھی۔