پاکستان کو آئندہ بھی آئی ایم ایف پروگرام کی ضرورت ہے، وزیراعظم

وزیراعظم شہباز شریف نے کہا ہے کہ پاکستان کو آئندہ بھی ایک نئے آئی ایم ایف پروگرام کی ضرورت ہے۔

ایف بی آر کی ڈیجیٹائزیشن

وزیراعظم شہباز شریف نے کہا کہ ایف بی آر کو 100 فیصد ڈیجیٹائز کرنے کا فیصلہ کیا ہے، 8 اپریل کو معروف اور تجربہ کار کنسلٹنٹس کی پیشکشیں آ جائیں گی، اپریل کے تیسرے یا چوتھے ہفتے میں کنسلٹنٹس کا تقرر کر دیا جائے گا، جلد از جلد اس پروگرام کو مکمل کرنے کی کوشش کریں گے۔

انہوں نے کہا کہ مافیا سالانہ اربوں اور کھربوں روپے قومی خزانے سے لوٹ رہا ہے، وزیر خزانہ اور چیئرمین ایف بی آر کو کہا ہے کہ وہ فرض شناس افسران کی فہرستیں بنائیں، جنہوں نے لوٹ مار کی ہے ان کے خلاف فی الفور کارروائی ہوگی، ریکوریوں سے حالات بہتر ہوں گے۔

’شاہانہ اخراجات میں کمی لانا ہوگی‘

شہباز شریف کا کہنا تھا کہ شاہانہ اخراجات کے تدارک کے لیے ایک کمیٹی بنا دی ہے۔ انہوں نے کہا یہ اخراجات کم کرنا ضروری ہیں، کئی محکمے ایسے ہیں جن کی ضرورت نہیں ہیں کچھ اٹھارہویں ترمیم کے تحت صوبوں کو دے دیے گئے ہیں جنہیں اب ان کے حوالے کرنا چاہیے، جہاں جہاں اخراجات میں کمی لائی جا سکتی ہے اس کے لیے کوشش کر رہے ہیں، جب اس کمیٹی کی سفارشات آئیں گی تو ان پر عمل کیا جائے گا۔

’سالانہ 400 سے 500 ارب روپے کی بجلی چوری ہوتی ہے‘

وزیراعظم نے کہا کہ ملک میں سالانہ 400 سے 500 ارب روپے کی بجلی چوری ہوتی ہے، وزرا سے کہا ہے کہ اس کا مکمل خاتمہ کرنا ہوگا، اس حوالے سے کوئی سفارش قبول نہیں ہوگی، تبھی قومی خزانہ بھرے گا، اس پر اگر مجھے بھی قیمت ادا کرنا پڑے تو کروں گا۔

انہوں نے کہا کہ یہ اتحادی حکومت ہے، وفاق اور صوبوں کو مل کر چیلنجز سے نمٹنا ہوگا، صوبائی وزرائے اعلیٰ سے التماس ہے کہ پاکستان کو اقوام عالم میں ممتاز مقام دلوانے کے لیے مل کر کام کریں اور ترقی میں اپنا حصہ ڈالیں۔

انہوں نے کہا کہ آئی ایم ایف کے ساتھ اگلے پروگرام پر بھی گفتگو کرنی ہے، جس کے لیے ٹیکس نیٹ کو بڑھانا ضروری ہے اور جو آئی ایم ایف کی شرط بھی ہے، وہ شعبے جو اربوں کا کاروبار کرتے ہیں اور ٹیکس نہیں دیتے انہیں ٹیکس نیٹ میں لانا ہوگا۔ وزیراعظم نے کہا کہ ایس آئی ایف سی ایک جاندار نطام ہے، اس میں سرخ فیتہ، تاخیری حربے اور نااہلیوں کا خاتمہ ہوتا ہے، اسے مل کر کامیاب بنانا ہوگا۔

شہدا اور ان کے والدین کو خراج تحسین

وزیراعظم شہباز شریف نے کہا 70 سے 80 ہزار پاکستانیوں نے جانوں کی قربانیاں دیکر دہشتگردی کا مکمل خاتمہ کیا تھا ملگر چند سال پہلے دہشتگردی نے پھر سر اٹھایا، اتنی توانائیاں اور سرمایہ خرچ کرنے کے بعد دہشتگردی کا واپس آنا المیے سے کم نہیں، دوبارہ اس کا سر کچلنے کے لیے ہمارے جوان ہتھیلی پر جان رکھ کر ان کا مقابلہ کر رہے ہیں۔

انہوں نے پاک فوج کے جوانوں اور ان کے ولدین کو خراج تحسین پیش کیا اور بتایا کہ کچھ دن پہلے وہ لیفٹیننت سید کاشف شہید اور کیپٹن احمد بدر شہید کے والدین سے ملنے گئے تھے، جہاں ان کے والدین کا کا حوصلہ دیکھ کر ایمان تازہ ہوگیا۔

انہوں نے کہا کہ کیپٹن احمد بدر کے والد نے بتایا کہ ان کا ایک ہی بیٹا تھا جس کی 4 بہیں تھیں، بیٹے نے وطن کے لیے جو قربانی دی اس پر فخر ہے، دہشتگردی کا مکمل خاتمہ ضروری ہے۔

’سرحد پار سے دہشتگری برداشت نہیں کی جائے گی‘

وزیراعظم نے کہا کہ انہوں نے شہدا کے والدین کو یقین دلایا کہ حکومت پاکستان اور افواج پاکستان اس کا خاتمہ کرنے کا مکمل عزم رکھتے ہیں اور دہشتگردی کا دوربارہ خاتمہ ہوگا، سرحد پار سے جو دہشت گردی ہو رہی ہے، اسے مزید برداشت نہیں کرسکتے۔

شہباز شریف نے مزید کہا کہ پاکستان کی سرحدیں دہشتگردی کے خلاف ریڈ لائن ہیں اور ہم اپنے ہمسایہ برادر ممالک کے ساتھ امن کے ساتھ رہنے چاہتے ہیں، ان کے ساتھ تجارت، کاروبار اور باہمی تعلقات کو بڑھانا چاہتے ہیں لیکن اگر ہمسایہ ملک کی سرزمین دہشت گردی کے لیے استعمال ہوگی تو یہ قابل برداشت نہیں ہے۔ انہوں نے کہا کہ ان ممالک کو یہ بات واضح ہونی چاہیے کہ پاکستان کسی بھی حالات میں سرحد پار سے دہشتگردی کو اب برداشت نہیں کرے گا۔

انہوں نے کہا کہ ہمسایہ ممالک سے گزارش ہے کہ آئیں بیٹھیں اور ملکر دہشتگردی کے خلاف لائحہ عمل تشکیل دیں جس پر ہم سنجیدگی کے ساتھ مل کر کام کریں تاکہ خطے میں امن قائم ہو، غربت اور بے روزگاری کا خاتمہ ہوسکے۔