رمضان المبارک کے تیسرے عشرے میں دنیا بھر میں مسلمان خصوصی عبادات کے لیے اعتکاف کرتے ہیں، اعتکاف کے لیے بڑی جامع مسجد کو ترجیح دی جاتی ہے۔
پاکستان میں بعض بڑی جامع مساجد ایسی بھی ہیں جہاں اعتکاف کرنے کے لیے پہلے درخواست دینا پڑتی ہے، اور فائنل لسٹ میں نام آنے کی صورت میں ہی اعتکاف کی اجازت ملتی ہے۔
مزید پڑھیں
وفاقی دارالحکومت اسلام آباد میں قائم مشہور فیصل مسجد میں بھی اعتکاف کے لیے رجسٹریشن کرانا پڑتی ہے۔
رواں برس رمضان المبارک کے تیسرے عشرے میں 300 افراد فیصل مسجد میں معتکف ہوں گے، عموماً جو مساجد سحر و افطار مہیا نہیں کرتی وہ کوئی فیس وغیرہ نہیں لیتی تاہم اس مرتبہ اعتکاف کے لیے فیصل مسجد انتظامیہ نے درخواستوں کے ساتھ 5 ہزار روپے فیس بھی طلب کی تھی۔
رجسٹریشن فیس ختم کرنے کے احکامات کس نے جاری کیے؟
اب فیصل مسجد سے ملحقہ انٹرنیشنل اسلامک یونیورسٹی کے سعودی صدر ڈاکٹر ھذال حمود العطیبی نے فیصل مسجد انتظامیہ کو اعتکاف کے حوالے سے بہترین انتظامات یقینی بنانے کی ہدایت کرتے ہوئے دعوۃ اکیڈمی کو رجسٹریشن کے لیے مقررہ 5 ہزار روپے فیس کو فی الفور ختم کرنے کے احکامات جاری کیے ہیں۔
ترجمان جامعہ کے مطابق صدر جامعہ نے دعوۃ اکیڈمی کو ہدایت کی کہ مستقبل میں فیصل مسجد سے متعلقہ ایسے امور جن کا تعلق عوام سے ہو اُس کی پیشگی منظوری صدر جامعہ سے لی جائے۔
ترجمان کے مطابق صدر جامعہ ڈاکٹر ھذال حمود العطیبی نے ہدایت کی کہ رمضان المبارک کے دوران فیصل مسجد میں نمازیوں کو ہرممکن سہولیات فراہم کی جائیں اور اعتکاف سے متعلقہ امور میں آسانیاں پیدا کی جائیں۔
