کراچی کے علاقے لانڈھی میں کم سن بچی کو پیٹرول چھڑک کر آگ لگانے کا واقعہ پیش آیا ہے، سوتیلے باپ نے 8 سالہ بچی کو پٹرول چھڑک کر آگ لگا دی، ملزم کے خلاف مقدمہ درج کرلیا گیا ہے۔
ایس ایس پی کورنگی حسن سردار نیازی کے مطابق گزشتہ ماہ 16 فروری کو کراچی کے علاقے کورنگی 36B میں سوتیلے باپ نے 8 سالہ بچی وانیہ کو پیٹرول چھڑک کر آگ لگائی، آگ لگنے سے معصوم کا 25 فیصد جسم جھلس گیا تھا۔
حسن سردار نے بتایا ہے کہ بچی کی والدہ نے شوہر کے خوف کی وجہ سے پولیس سے معاملے کو چھپایا اور بچی وانیہ کا علاج کبھی سول اسپتال اور کبھی انڈس اسپتال سے کرواتی رہیں۔
مزید پڑھیں
سوتیلے باپ کے ظلم کی شکار وانیہ کی والدہ نے اب لانڈھی تھانے میں واقعے کا مقدمہ درج کروا دیا ہے، مقدمے کی ایف آئی آر کے متن میں انہوں نے مؤقف اختیار کیا ہے کہ 2 سال قبل ان کی شادی طارق نامی شخص سے ہوٸی جس سے ان کا ایک بیٹا بھی ہے۔
’ سابقہ شوہر امجد سے میری ایک 8 سالہ بیٹی ہے جو میرے ساتھ رہتی ہے، 16 فروری کو بیٹی ٹیوشن سے گھر آٸی تو موجودہ شوہر طارق نے بیٹی کو مارنا پیٹنا شروع کردیا، بچی کو بچانے لگی تو شوہر نے غصے میں آ کر مجھے بھی مارا اور بیٹی پر پیٹرول چھڑک کر اس کو آگ لگا دی۔‘
مدعی نے بتایا ہے کہ وہ مشکل سے بچی کو بچا کر سول اسپتال لے گئیں اور وہاں سے اس کا علاج کروایا، اب شوہر ان کو بھی مارنے کی دھمکیاں دے رہا ہے۔
ایس ایس پی لانڈھی کے مطابق واقعے کا مقدمہ خاتون کی مدعیت میں لانڈھی پولیس اسٹیشن میں درج کرلیا گیا ہے جبکہ ملزم فرار ہے جس کی تلاش جاری ہے، ملزم کو جلد گرفتار کر لیا جائے گا۔
