ہدایتکار اور اداکار سرمد کھوسٹ نے انکشاف کیا ہے کہ ان کا نام ستارہ امتیاز کی فہرست سے نکال دیا گیا ہے جو انہیں 23 مارچ کو وصول کرنا تھا۔
اداکار سرمد کھوسٹ نے میٹا کی مشہور ایپ انسٹاگرام کی اسٹوری پر ستارہ امتیاز کے ناموں کی ایک فہرست شئیر کرتے ہوئے لکھا کہ میرا نام صدارتی ایوارڈز کی 14 اگست 2023 کی فہرست سے غائب ہے اس لیے جن لوگوں نے گزشتہ سال مجھے مبارک باد دی تھی وہ اپنی مبارک باد واپس لے لیں۔
سرمد کھوسٹ نے اپنی اسٹوری میں لکھا کہ یہ لسٹ میں نے خود تو نہیں بنائی تھی اور جہاں تک مجھے یاد ہے کہ حتمی فہرست 14 اگست کو جاری کی گئی تھی، ان کا مزید کہنا تھا کہ یہ فہرست حتمی ہوتی ہے جب تک کہ وصول کنندہ ایوارڈ قبول کرنے سے انکار نہ کردے۔
واضح رہے کہ گزشتہ سال اگست 2023 میں یوم آزادی کے موقع پر مختلف شعبوں میں نمایاں خدمات انجام دینے والے 304 پاکستانیوں اور غیر ملکیوں کو اعزازات کے لیے منتخب کیا گیا تھا۔ سرمد کھوسٹ کا نام بھی اعزاز پانے والوں میں شامل تھا۔
فلم انڈسٹری میں جن دیگر لوگوں کو اعزاز دیا جائے گا ان میں عدنان صدیقی، زبیدہ (نغمہ) ، حسن عسکری، نصیر بیگ مرزا، عجب خان (خطاط، مصور) اور باقر عباس (بانسری بجانے والے) شامل ہیں۔
