اسلام آباد میں دو گروپوں کے درمیان فائرنگ کے تبادلے میں ایک ہی خاندان کے 3 افراد جاں بحق اور دیگر 5 زخمی ہو گئے ہیں۔ آئی سی سی پی او نے ملزمان کو فوری گرفتار کرنے کا حکم دے دیا۔
مزید پڑھیں
اسلام آباد کیپٹل پولیس کے ترجمان کی جانب سے جاری بیان کے مطابق جمعہ کو تھانہ سہالہ کے علاقہ میں بچوں کی لڑائی کے بعد ذاتی رنجش کی بنیاد پر دو گروپوں میں خونریز تصادم کے نتیجے میں ایک ہی خاندان کے 3 افراد جاں بحق ہو گئے ہیں جب کہ دیگر 5 زخمی ہو گئے ہیں۔
ترجمان کے مطابق فریقین کے درمیان ذاتی رنجش چل رہی تھی اور یہی رنجش خونریز تصادم میں بدل گئی جس سے 3 افراد جاں بحق اور زخمی افراد ایک ہی خاندان سے تعلق رکھتے ہیں۔
فائرنگ کے واقعے کے بعد پولیس کی بھاری نفری موقع پر پہنچ گئی اور نعشوں اور زخمیوں کو اسپتال منتقل کردیا گیا ۔
ترجمان اسلام آباد پولیس کے مطابق آئی سی سی پی او ڈاکٹر اکبر ناصر خاں نے واقع کا سختی سے نوٹس لے کر، فائرنگ میں ملوث ملزمان کو جلد از جلد گرفتار کرکے قانون کے کٹہرے میں لانے کا حکم دیا ہے۔
