پاکستان مسلم لیگ ن کے سینیئر رہنما و سابق وفاقی وزیر داخلہ رانا ثنااللہ نے کہا ہے کہ عمران خان اپنی مخصوص سیاست سے الگ ہو جائیں تو معاملہ ہی ختم ہو جائے۔
نجی ٹی وی کے پروگرام میں گفتگو کرتے ہوئے رانا ثنااللہ نے کہاکہ پی ٹی آئی اپنے بانی کے نظریہ پر چل رہی ہے جو کہتا ہے میں کسی کو نہیں چھوڑوں گا۔
انہوں نے کہاکہ عمران خان ہمارا سیاسی وجود ختم کرنا چاہتے ہیں تو ہم کیسے انہیں تسلیم کرلیں۔
مزید پڑھیں
سابق وزیر داخلہ نے کہاکہ شہباز شریف کو اتحادی حکومت چلانے کا بہت تجربہ ہے، انہوں نے اپنی ٹیم بہت دانائی سے تشکیل دی ہے۔
ایک سوال کے جواب میں انہوں نے کہاکہ محمد اورنگزیب کو وزیر خزانہ اور محسن نقوی کو وزیر داخلہ بنانے کا فیصلہ درست ہے۔
رانا ثنااللہ نے کہاکہ نواز شریف کے خلاف اس وقت کوئی کیس نہیں وہ آزاد شہری ہیں۔
انہوں نے کہاکہ نواز شریف عمرہ کے لیے جائیں گے، اگر لندن میں کوئی چیک اپ کرانا ہوا تو وہاں بھی چلے جائیں گے لیکن مستقل طور پر پاکستان میں ہی رہیں گے۔
رانا ثنااللہ نے کہاکہ ہم عمران خان کو بے نقاب کریں گے، 9 مئی کے ملزمان کے خلاف جس طرح کارروائی ہونی چاہیے تھی نہیں ہوئی۔
انہوں نے مزید کہاکہ عمران خان کو سزاؤں سے نقصان نہیں ہوا بلکہ ہمدری حاصل ہوئی۔
