اٹلی کے نزدیک غیر قانونی تارکین وطن سے بھری کشتی کے حادثے میں ہلاک ہونے والی پاکستانی ایتھلیٹ شاہدہ رضا کی میت کراچی پہنچادی گئی ہے۔ جہاں اسے آج ہی تدفین کے لیے کوئٹہ روانہ کردیا جائے گا۔
پاکستانی کی قومی ہاکی اور فٹبال ٹیم کی سابق کھلاڑی شاہدہ رضا کی میت دوپہر کو کوئٹہ کے علاقہ مری آباد میں واقع ان کے آبائی گھر منتقل کی جائے گی۔
اپنے مفلوج بچے کے علاج کی خاطر یورپ جانے کی خواہشمند شاہدہ رضا جس بدقسمت کشتی پر دیگر تارکین وطن کے ہمراہ سوار تھیں وہ اٹلی کے ساحل سے کچھ فاصلہ پر 26 فروری کو سمندری طوفان کا شکار ہوگئی تھی۔
پاکستان کی نمائندگی کرنیوالی 27 سالہ شاہدہ رضا کا تعلق کوئٹہ کی ہزارہ کمیونٹی سے تھا۔ لواحقین کے مطابق شاہدہ رضا کی تدفین علمدار روڈ کے بہشت زینب قبرستان میں ہوگی۔