پاکستان ریلوے نے عید الفطر کے موقع پر عوام الناس کی سہولت کے لیے کراچی سے 2 خصوصی ٹرینیں چلانے کا فیصلہ کیا ہے۔
مزید پڑھیں
پاکستان ریلوے کے مطابق، کراچی سے پہلی ٹرین 7 اپریل کو شام 6 بجے پشاور کے لیے روانہ ہوگی۔ یہ ٹرین حیدر آباد، ٹنڈو آدم، نواب شاہ، روہڑی، خانپور، بہاولپور، ملتان کینٹ، خانیوال، شورکوٹ کینٹ، ٹوبہ ٹیک سنگھ، گوجرہ، فیصل آباد، سانگلہ ہل، حافظ آباد، وزیر آباد، لالہ موسیٰ، جہلم، راولپنڈی، ٹیکسلا کینٹ، اٹک سٹی، نوشہرہ اور پھر پشاور سٹی سے ہوتے ہوئے 8 اپریل کو رات ایک بجکر 15 منٹ پر پشاور کینٹ پہنچے گی۔
دوسری اسپیشل ٹرین کراچی اور لاہور کے درمیان 8 اپریل کو رات 8 بج کر 15 منٹ پر چلے گی، یہ ٹرین کراچی کینٹ، لانڈھی، حیدرآباد، ٹنڈو آدم، نواب شاہ، روہڑی، صادق آباد، رحیم یار خان، خانپور، بہاولپور، ملتان کینٹ، خانیوال، میاں چنوں، چیچا وطنی، ساہیوال، یوسف والا، اوکاڑہ، پتوکی، رائیونڈ اور کوٹ لکھپت سے ہوتے ہوئے 9 اپریل کو شام 5 بج کر 55 منٹ پر لاہور پہنچے گی۔
پہلی خصوصی ٹرین 17 کوچز پر مشتمل ہوگی، جس میں 1046 مسافروں کے بیٹھنے کی گنجائش ہوگی، جبکہ دوسری خصوصی عید ٹرین 18 کوچز پر مشتمل ہوگی، جس میں 2 بزنس اور 2 اسٹینڈرڈ کلاس کوچز ہیں، بقیہ بوگیاں اکانومی کلاس کی ہوں گی۔
