وزیراعلیٰ خیبرپختونخوا علی امین گنڈاپور کے خلاف توہین الیکشن کمیشن کیس کی سماعت کے دوران علی امین گنڈا پور کے وکلا نے الیکشن کمیشن کے مکمل ہونے تک سماعت روکنے کی درخواست کردی جس پر چیف الیکشن کمشنر نے فیصلہ محفوظ کرلیا۔
مزید پڑھیں
تفصیلات کے مطابق، چیف الیکشن کمشنر جسٹس ریٹائرڈ عبدالرشید سلہریا نے درخواست کی سماعت کی۔ دوران سماعت وزیراعلیٰ خیبرپختونخوا کے وکلا نے دلائل دیے کہ الیکشن کمیشن کے ممبران کے تقرر اور الیکشن کمیشن کی تکمیل تک چیف الیکشن کمشنر اکیلے کیس کی سماعت نہیں کرسکتے۔
علی امین گنڈا پور کے وکلا نے چیف الیکشن کمشنر سے الیکشن کمیشن کی تکمیل تک کیس کی سماعت روکنے کی درخواست کی۔ جبکہ ایڈیشنل ایڈووکیٹ جنرل نے اپنے دلائل میں کہا کہ چیف الیکشن کمشنر کو سماعت کا اختیار حاصل ہے۔
درخواست گزار راجہ زین ایڈووکیٹ نے کہا کہ علی امین گنڈاپور الیکشن کمیشن کی توہین کے مرتکب ہوئے ہیں، کیس کی سماعت رکوانے سے متعلق ان کی درخواست مسترد کی جائے۔
وکلا کے دلائل کے بعد چیف الیکشن کمشنر جسٹس ریٹائرڈ عبدالرشید سلہریا نے علی امین گنڈاپور کی سماعت روکنے کی درخواست پر فیصلہ محفوظ کرلیا۔
واضح رہے کہ 5 مارچ کوالیکشن کمیشن آزادکشمیر نے وزیراعلیٰ خیبرپختونخوا علی امین گنڈاپور کو 11 مارچ کو پیش ہونے کا حکم دیا تھا اور مقررہ تاریخ کو پیش نہ ہونے کی صور ت میں سخت کارروائی کا عندیہ دیا تھا۔ علی امین گنڈاپور کے خلاف آزاد جموں و کشمیر الیکشن کمیشن میں انتخابات میں ضابطہ اخلاق کی خلاف ورزی کی درخواست دائر کی گئی تھی۔