خیبر پختونخوا حکومت نے سال 2024-25 کو صوبے کی کی بلند ترین چوٹی ترچ میر کے سال کے طور پر منانے کا فیصلہ کیا ہے۔
مزید پڑھیں
یہ بات وزیراعلیٰ خیبر پختونخوا کے مشیر برائے سیاحت و ثقافت زاہد چن زیب نے پشاورمیں جمعرات کو سیاحتی اسٹیک ہولڈرز وفد سے ملاقات کے دوران کہی۔
اجلاس میں سیاحت سے منسلک اسٹیک ہولڈرز نے مشیر سیاحت کو اپنے مسائل پیش کیے۔
کوہ پیمائی کی رائلٹی، ٹریکنگ فیس معاف کرنے کا اعلان
اس موقع پر سال 2024-25 کے لیے کوہ پیمائی کی رائلٹی اور ٹریکنگ فیس معاف کرنے کا اعلان کیا گیا۔
مشیر سیاحت زاہد چن زیب نے کہا کہ ترچ میر پہاڑ کو خیبرپختونخوا کے سیاحتی عنوان کے طور پر تصور کیا جائے گا۔
ترچ میر چوٹی سر کرنے کے لیے مختلف بین الاقوامی کوہ پیماؤں کو مدعو کیا جائے گا۔
مشیر سیاحت نے تمام اسٹیک ہولڈرز کو مکمل تعاون کی یقین دہانی کرائی۔
’حکومت سیاحت کے فروغ کے پروگرامز کو بھی سپورٹ کرے گی‘
زاہد چن زیب نے کہا کہ اسٹیک ہولڈرز سیاحت کے فروغ کے لیے مختلف پروگرام ترتیب دیں ہم سپورٹ کریں گے۔
انہوں نے کہا کہ سیاحوں کے این او سی کے مسئلے کو متعلقہ حکام کے ساتھ ملاقات کے بعد جلد حل کردیا جائے گا۔
’ٹورازم پولیس کی اپ گریڈیشین ہوگی‘
ان کا کہنا تھا کہ خیبرپختونخوا ٹورازم پولیس کو فرسٹ ایڈ بکس کے ساتھ اپ گریڈ کرکے مزید ٹریننگ کرائیں گے۔
مشیر سیاحت نے یہ بھی یقین دہانی کرائی کہ سیاحتی مقامات پر تجاوزات کا خاتمہ یقینی بنایا جائے گا اور سیاحتی مقامات کو جانے والی سڑکوں کی حالت زار بہتر بنائی جائے گی۔
