انسپیکٹر جنرل آف پنجاب پولیس عثمان انور نے لاہور ہائیکورٹ سے درخواست کی ہے کہ تفتیشی افسروں کو عمران خان کی رہائش گاہ تک رسائی کی اجازت دی جائے ۔
آئی جی پنجاب عثمان انور کی جانب سے دائر کی گئی درخواست میں موقف اختیار کیا گیا ہے کہ پولیس ٹرائل عدالت کے فیصلے پر عمل درآمد کے لیے زمان پارک پہنچی جہاں پولیس کو پی ٹی آئی کے کارکنوں کی طرف سے سخت مزاحمت کا سامنا کرنا پڑا۔
سیاسی جماعت کے کارکنوں کے پتھراؤ سے متعدد پولیس افسران اور اہلکار زخمی ہوئے۔ کارکنوں نے پولیس پر پیٹرول بم پھینکے جس سے قیمتی گاڑیوں کو آگ لگی۔ کارکنوں نے سرکاری املاک کو نقصان پہنچایا اور قانون کو ہاتھ میں لیا۔
درخواست میں مزید کہا گیا ہے کہ زمان پارک میں مشتبہ تنظیموں کے افراد کی موجودگی کی اطلاعات بھی ہیں۔ پولیس کو قانون ہاتھ میں لینے والے کارکنوں کی گرفتاری مطلوب ہے جو زمان پارک میں چھپے بیٹھے ہیں۔
پولیس کو زمان پارک میں رسائی نہ ہونے سے نامزد ملزموں کی گرفتاری نہیں ہو پا رہی۔ عدالت پولیس کے تفتیش کاروں کو عمران خان کی رہائش گاہ تک رسائی کی اجازت دے۔
