وزیراعظم محمد شہباز شریف نے آئندہ 5 سالوں میں ملکی برآمدات دگُنا کرنے کے لیے لائحہ عمل بنانے، ای کامرس شعبے میں برآمد کنندگان کو سہولیات فراہم کرنے اور وزارت تجارت کو ’میڈ اِن پاکستان‘برانڈ برآمد کرنے والوں کے مسائل کے فوری حل کرنے کی ہدایت کی ہے۔
مزید پڑھیں
وزیرِ اعظم محمد شہباز شریف کی زیرِ صدارت برآمدی شعبے کی ترقی پر اعلیٰ سطح کا اجلاس منعقد ہوا۔ اجلاس میں وفاقی وزرا جام کمال خان، رانا تنویر حسین، ای-کامرس شعبے کے نامور برآمد کنندہ انٹرپرینیور ز بشمول یوٹوپیا کے چیف ایگزیکٹو آفیسر جبران نیاز، ذیشان شاہ، سلمان احمد اور متعلقہ اعلیٰ حکام نے شرکت کی۔
اجلاس کو پاکستان میں برآمدی شعبے کی ترقی کے لیے تجاویز پیش کی گئیں۔ وزیر اعظم کو برآمدی شعبے کی سہولت کے لیے سفارشات اور برآمدات کو فروغ دینے کے لیے لائحہ عمل پر بھی بریفنگ دی گئی۔
وزیراعظم نے وزارت تجارت کو تمام اسٹیک ہولڈرز اور انٹرپرینیورز سے مشاورت کے بعد ملکی برآمدات کو آئندہ 5 برس میں دگُنا کرنے کے حوالے سے لائحہ عمل مرتب کرکے پیش کرنے کی ہدایت کی۔
وزیراعظم نے ای کامرس شعبے میں برآمد کنندگان کو سہولیات فراہم کرنے اور وزارت تجارت کو ’میڈ اِن پاکستان‘ برانڈ برآمد کرنے والوں کے مسائل کے فوری حل کی بھی ہدایت کی۔
وزیراعظم نے کہا کہ پاکستان کے برآمدی شعبے کی مکمل استعداد سے بھرپور فائدہ اٹھانے کے لیے اقدامات کر رہے ہیں۔ انہوں نے ہدایت کی کہ آئی ٹی، گھریلو استعمال کی مصنوعات، ٹیکسٹائل اور منفرد شعبوں کی برآمدات کے فروغ کے لیے شعبے کے اسٹیک ہولڈرز کو اعتماد میں لیا جائے۔ وزیراعظم نے ہدایت کی کہ ایسی برآمدات جو عالمی ویلیو چینز کا حصہ ہوں ان کی صنعت کی ترقی کی حوصلہ افزائی کے لیے سفارشات مرتب کرکے پیش کی جائیں۔
