اسلام آباد میں واقع مسجد رحمت اللعالمین تمام مساجد کے لیے ایک مثال بن چکی ہے۔ اس مسجد کے ایسے کئی منفرد منصوبے ہیں جو ہر دیکھنے اور سننے والے کو اس کے کے بارے میں مزید جاننے کے لیے اپنی جانب راغب کرلیتے ہیں۔
مزید پڑھیں
مسجد میں موجود ہر سیکشن الگ ہی رنگ میں رنگا ہوا ہے۔ مسجد فارمیسی، کلینک، دسترخوان، راشن اسٹور، شادی ہال اور دیگر منصوبے ایک ہی مسجد کی چھت تلے چل رہے ہیں۔
اسی طرح، اس مسجد کی جانب سے کا ایک نہایت منفرد اور بہترین منصوبہ ’مسجد بوتیک‘ کے نام سے شروع کیا گیا ہے، جس کا مقصد بیواؤں، غریب اور مستحق افراد کے لیے کپڑوں کا انتظام کرنا ہے۔ عید کے موقع پر ایسے تمام افراد جو اتنی حیثیت نہیں رکھتے کہ نئے کپڑے خرید سکیں، وہ یہاں آکر اپنی پسند کے کپڑے بالکل مفت حاصل کرسکتے ہیں۔
اس مسجد بوتیک میں صرف خواتین ہی نہیں بلکہ بچوں اور مردوں کے کپڑے بھی موجود ہیں۔
لوگ مستحق افراد کے لیے خود کپڑے دے کر جاتے ہیں، خطیب مسجد
مسجد کے خطیب ڈاکٹر عبیدالرحمان بشیر کا کہنا ہے کہ اس منصوبے کو اس لیے بھی شروع کیا گیا کہ خاص طور پر تہواروں یعنی عید اور دیگر تقاریب کے مواقع پر مستحق افراد اور بچے مایوس ہوتے ہیں۔ ’جب وہ دیکھتے ہیں کہ باقی بہت سے لوگ خریداریاں کر رہے ہیں، لیکن انہوں نے اب تک کپڑے نہیں لیے تو ان بچوں کی عید کی خوشیاں پھیکی پڑ جاتی ہیں۔‘
انہوں نے مزید بتایا کہ مسجد کا یہ منصوبہ اسی لیے شروع کیا گیا کہ کوئی بھی فرد عید کی خوشیوں سے محروم نہ رہے۔ اس لیے یہاں آنے والا ہر شخص اپنی پسند کا لباس لے سکتا ہے، پہلے انہیں تمام کپڑے دکھائے جاتے ہیں، پھر جو انہیں پسند آتا ہے وہ لے جاتے ہیں۔
ایک سوال کے جواب میں انہوں نے بتایا کہ اس کام میں ان کا ایک روپیہ تک نہیں لگتا۔ ان کا کہنا تھا کہ لوگ ہمیں کپڑے خود دے کر جاتے ہیں، ہمارا صرف اتنا کام ہوتا ہے کہ ان کپڑوں کو سیدھا کریں، بچوں، خواتین اور مردوں کے کپڑوں کو الگ الگ ترتیب دیں اور پھر مستحق افراد تک پہنچائیں، اور یہ ذمہ داری ہم ادا کررہے ہیں۔
