وزیراعلیٰ پنجاب مریم نواز شریف کی زیرصدارت ایپکس کمیٹی کے اجلاس میں بشام واقعہ میں چینی باشندوں کی ہلاکت کی شدید مذمت کرتے ہوئے پنجاب میں ترقیاتی پراجیکٹس پر کا م کرنے والوں چینی باشندوں کی فول پروف سیکیورٹی پالیسی پر مؤثر عمل درآمد پر اتفاق کیا گیا۔
جمعہ کو ہونے والے اجلاس کے بعد جاری اعلامیے میں کہا گیا ہے کہ پنجاب میں چینی باشندوں کی سیکیورٹی یقینی بنانے کے لیے تمام وسائل بروئے کار لانے کا فیصلہ کیا گیا ہے۔
اجلاس میں اس بات پر اتفاق کیا گیا کہ سی پیک پراجیکٹ پر کام کرنے والے چینی ماہرین کے تحفظ کے لیے فول پروف سیکیورٹی مہیا کی جائے گی۔
مزید پڑھیں
چینی باشندوں کی سیکیورٹی یقینی بنانے کے لیے تمام وسائل بروئے کار لانے کا فیصلہ کرتے ہوئے دہشتگرد ی، اسمگلنگ کو روکنے کے لیے 24/7 صوبائی سرحدوں پر چیک پوسٹیں بنانے کا بھی فیصلہ کیا گیا۔
اعلامیے کے مطابق جمعتہ الوداع کے حوالے سے ملک وقوم کی سلامتی اورامن و ترقی کے لیے دعا بھی کی گئی۔
امن و امان کے لیے شہدا کی قربانیوں کو یاد رکھا جائے گا، مریم نواز
اجلاس سے خطاب کرتے ہوئے وزیر اعلیٰ پنجاب مریم نواز نے کہا کہ دہشت گردی کے چیلنج کا سامنا کرنے کے لیے ہم سب ایک پیج پر ہیں۔ دہشت گردی پیچیدہ وار فیئر کی شکل اختیار کر رہی ہے۔
انہوں نے کہا کہ دہشت گردی کے خاتمے کے لیے پاکستان آرمی اور دیگر سیکیورٹی اداروں کے کردار کو سراہتی ہوں۔ امن وامان کے لیے تمام شہدا کی قربانیوں کو ہمیشہ یاد رکھا جائے گا ۔
انہوں نے کہا کہ نیشنل ایکشن پلان کو اپ گریڈ کرنا ہے اور موجودہ لوپ ہولز ختم کرنے ہیں، مذہبی انتہا پسندی اور دہشت گردی کا خاتمہ بہت بڑا چیلنج ہے۔
اجلاس سے خطاب کرتے ہوئے وزیر اعلیٰ نے مزید کہا کہ سیاستدان کی حیثیت سے برے حالات اور مشکلات سے گزرتے ہوئے بھی کبھی 9 مئی جیسے واقعہ کا خیال تک نہیں آیا۔
سیاسی فاشزم بھی دہشتگرد ی کی شکل اختیار کر رہا ہے
مریم نواز نے کہا کہ سیاسی فاشزم بھی دہشتگرد ی کی شکل اختیار کر رہا ہے، ٹی ٹی پی جو نہ کرسکی وہ ایک نام نہاد سیاسی جماعت نے کر دکھایا۔
سوشل میڈیا بل عوامی مفاد میں جلد پیش کیا جائے گا
سوشل میڈیا کے ذریعے نوجوانوں کی برین واشنگ کرنے کا سدباب ناگزیر ہے، سوشل میڈیا پر ملک وقوم کے مفادات کے تحفظ کے لیے بل جلد پیش کیا جائے گا۔
معیشت کی بحالی کے لیے دہشتگردی کا خاتمہ ناگزیر ہے
انہوں نے کہا کہ پاکستان کی بات آتی ہے تو ہر چیز پس منظر میں چلی جاتی ہے۔ 9 مئی کی وجہ سے پیدا شدہ غیر یقینی اور عدم استحکام کی وجہ سے سرمایہ کار ہچکچاہٹ کا شکار ہیں۔ معیشت کی بحالی اور قومی خوشحالی کے لئے دہشت گردی کا خاتمہ لازمی تقاضا ہے۔
عورتوں اور بچوں کے تحفظ کے لیے اسپیڈی ٹرائل کورٹ بنا رہے ہیں
انہوں نے کہا کہ عورتوں اور بچوں کے خلاف جرائم کے خاتمے کے لیے سپیشل اسپیڈی ٹرائل کورٹ بنا رہے ہیں ۔سیکیورٹی فورسز کو جدید ٹیکنالوجی، اے آئی کے استعمال، بہترین ٹریننگ، جدید اسلحے اور انٹیلی جنس نظام کو مزید اپ گریڈ کریں۔
دہشت گردی کے خاتمے کے لیے ٹیکنالوجی کا استعمال ناگزیر ہے، کور کمانڈر لاہور
کور کمانڈر لاہور لیفٹیننٹ جنرل سید عامر رضا نے کہا کہ دہشت گردی کے خاتمے کے لیے اشتراک کار اور تعاون جاری رکھا جائے گا۔
پنجاب میں دہشت گردی کے سدباب کے لیے مؤثر اقدامات کیے جارہے ہیں۔سی ٹی ڈی اور دیگر ادارے ملکر قابل تحسین کام کررہے ہیں۔ پنجاب کو غیر قانونی طور پر مقیم غیر ملکیوں کا چیلنچ بھی درپیش ہے۔
میٹنگ میں کور کمانڈر لاہور لیفٹیننٹ جنرل سید عامر رضا اور دیگر اعلی عسکری حکام نے شرکت کی جبکہ سینیئر صوبائی وزیر مریم اورنگزیب، چیف سیکرٹری، آئی جی پولیس اور دیگر متعلقہ حکام بھی موجود تھے۔
