آنکھوں سے آنکھیں نہ ملیں تو کیا، دل ملنا ضروری ہیں

یہ شادی شدہ جوڑا ایک دوسرے سے حقیقت میں آنکھیں نہیں ملا سکتا کیونکہ ان دونوں کے قد میں تقریباً 3 فٹ کا فرق ہے، لیکن ان دونوں کی شادی سے ایک بات تو واضح ہوچکی ہے کہ اس فرق کے باوجود یہ دونوں ایک دوسرے کے لیے ہی بنے ہیں۔

امریکا کی ریاست ورجینیا سے تعلق رکھنے والے لیری میکڈونل اور جیسیکا برنس میکڈونل نے ایک دوسرے سے قد میں 86.36 سینٹی میٹر (2 فٹ 9 انچ) کا فرق ہونے کے باوجود شادی کرکے نیا ریکارڈ قائم کردیا ہے۔

مغربی میڈیا رپورٹس کے مطابق، جیسیکا کا قد 177.8 سینٹی میٹر (5 فٹ 10 انچ) ہے جبکہ لیری میکڈونل کا قد 91.44 سینٹی میٹر (3 فٹ) ہے۔ حال ہی میں، اس جوڑے نے ایک اطالوی ٹی وی سیریز میں شرکت کی اور وہاں شائقین کو اپنی لو اسٹوری کے بارے میں بتایا۔

اس لو اسٹوری کے مطابق، یہ محبت اس وقت پروان چحری جب لیری کی عمر 42 اور جیسیکا 40 برس کی تھیں۔ جیسیکا نے اس حوالے سے بتایا کہ ہم دونوں بچپن سے ہی دوستوں کے ایک گروپ میں شامل تھے، جب ہم بڑے ہوئے تو ہم دونوں میں قربت بھی بڑھنے لگی۔

جیسیکا نے مزید بتایا کہ بعد میں لیری ان کے گھر کے قریب ایک دوست کے ساتھ رہنے لگے، جس کے بعد ان دونوں کی اکثر ملاقاتیں ہونے لگیں۔ اس وقت جیسیکا کا ایک بوائے فرینڈ تھا لیکن بعد میں لیری اور جیسیکا کے درمیان محبت بڑھنے لگی اور پھر ایک دن ان دونوں نے شادی کا فیصلہ کیا۔

لیری کا کہنا ہے کہ جیسیکا ان کے لیے بہت خاص ہیں، وہ میری ہر بات اور میرے فضول کے چٹکلوں پر ہنستی رہتی ہیں۔ انہوں نے بتایا کہ 2006 کے موسم گرما میں جیسیکا سے ملنا شروع کیا اور اسی برس دسمبر میں ان دونوں کی شادی ہوگئی۔ ان دونوں کے 4 بچے ہیں جن میں سب سے بڑی بیٹی کی عمر 16 برس اور سب سے چھوٹے بچے کی عمر ایک سال ہے۔