لاٹری وینڈنگ مشین پر انجانے میں غلط بٹن دبانے پر ایک امریکی خاتون نےلاکھوں ڈالر کا انعام جیت لیا۔
مزید پڑھیں
امریکی میڈیا کے مطابق ریاست ورجینیا سے تعلق رکھنے والی خاتون میریم لانگ نے ورجینیا لاٹری کے حکام کو انٹرویو میں بتایا کہ وہ بلیکزبرگ کی ساؤتھ مین اسٹریٹ گئیں جہاں وہ میگا ملینز کا ٹکٹ خریدنا چاہتی تھیں۔
میریم نے کہا کہ ان کی نظر وہاں رکھی لاٹری وینڈنگ مشین پر پڑی، وہ اس کے پاس گئیں اور جو بٹن دبانا تھا اس کے بجائے ان کا ہاتھ دوسرے بٹن پر پڑگیا جس کے ساتھ ہی انہیں مشین سے 18 مارچ کا پاور بال ڈرائنگ ٹکٹ موصول ہوا۔
انہوں نے فوری طور پر ڈرائنگ ٹکٹ میں پہلے پانچ نمبروں کو لاٹری کے نمبروں سے ملایا جس کے بعد ان کی حیرت کی انتہا نہیں رہی کہ وہ نمبر10 لاکھ ڈالرز انعام کے نمبر تھے۔
خاتون نے مزید بتایا کہ یہ ان کی زندگی کی بہترین غلطی تھی اور انہیں کچھ سجھائی نہیں دے رہا تھا۔ انہوں نے بتایا کہ جب انہیں احساس ہوا کہ انہوں نے 10 لاکھ ڈالر جیت لیے ہیں تو ان کا دل تیزی سے دھڑکنے لگا اور اس طرح یہ واقعہ ان کی زندگی کا سب سے خوشگوار حادثہ بن گیا۔
