تحریک تحفظ آئین پاکستان، حکومت کو اپنی لپیٹ میں لے کر رہے گی: عمر ایوب

پی ٹی آئی کے مرکزی جنرل سیکریٹری عمر ایوب نے کہا ہے کہ کل تحفظ آئین پاکستان کے بلوچستان میں 2 کامیاب جلسے ہوئے۔ خراب موسم اور انتظامیہ کی مداخلت کے باوجود ہم نے کامیاب جلسے کیے۔ تحریک تحفظ آئین پاکستان اس حکومت کو اپنے لپیٹ لے کر رہے گی۔

کوئٹہ میں پریس کانفرنس کرتے ہوئے عمر ایوب کا کہنا تھا کہ میں شریف خلجی کو پی ٹی آئی جوائن کرنے پر خوش آمدید کہتا ہوں۔ فارم 47 کے بیساکھیوں پر کھڑی حکومتوں کو عوام کا سیلاب بہا کر لے جائے گا۔ قیدی نمبر 804 نے عوام کو شعور دیا ہے۔

عمر ایوب کا کہنا تھا کہ قاسم سوری اور سالار کاکڑ سخت دور سے گزر رہے ہیں۔ میں قاسم سوری اور سالار کاکڑ کو خراج عقیدت پیش کرتا ہوں۔ آنے والا وقت پی ٹی آئی کا ہے۔ اسلام آباد کے 6 ججز کو زدکوب کیا جارہا ہے۔ نچلی عدلیہ کو بھی پریشرائز کیا جارہا ہے۔

ان کا کہنا تھا کہ بشریٰ بی بی خان صاحب کی کمزوری نہیں بلکہ قوت ہے۔ سویلین کے لیے آرمی کورٹس نہیں بلکہ سویلین کورٹ ہیں۔ ہم نے سپریم کورٹ میں آرمی کورٹس کے خلاف اپیل دائر کی ہے۔ بلوچستان ہمارے ماتھے کا جھومر ہے۔ سب سے پہلے بلوچستان کے مسائل حل کرنا ہوں گے پھر باقی پاکستان کے۔