آئین کی بالادستی کے لیے آغاز کردہ اپوزیشن اتحاد پر مبنی احتجاجی تحریک کا رخ فیصل آباد کی جانب گامزن ہے، تحریک تحفظ آئین پاکستان کی قیادت کا وفد ملک گیر پُرامن تحریک کے تناظر میں آج ایک روزہ دورے پر فیصل آباد پہنچے گا۔
مزید پڑھیں
وفد میں تحریک تحفظ آئین پاکستان کے سربراہ محمود خان اچکزئی، سابق اسپیکر قومی اسمبلی و رہنما تحریک انصاف اسد قیصر اور سردار لطیف کھوسہ شامل ہیں۔ سنی اتحاد کونسل کے صدر صاحبزادہ حامد رضا اور ترجمان تحریک تحفظ آئین پاکستان اخونزادہ حسین یوسفزئی بھی وفد کا حصہ ہیں۔
بی این پی کے رہنما ساجد ترین بھی وفد کے ہمراہ فیصل آباد جائیں گے، تحریک تحفظ آئین پاکستان کی قیادت کا وفد فیصل آباد میں ایک روزہ دورہ کے دوران ملک گیر احتجاجی تحریک کے حوالے سے اہم تقاریب میں شرکت کرے گا۔
وفد کے اراکین آئین کی بالادستی کے تحریک کے تناظر میں فیصل آباد کی مقامی قیادت اور اراکین صوبائی اسمبلی سے ملاقات کریں گے، وفد میں شامل قائدین دورے کے دوران فیصل آباد بار ایسوسی ایشن کے ممبران سے خطاب کریں گے۔
تحریک کی قیادت کسانوں کے وفود سے ملاقاتیں کرے گی، بعد ازاں فیصل آباد پریس کلب کے ممبران سمیت سینئر صحافیوں اور سینئر وکلا کیساتھ ملاقات کرے گی۔
