پاکستان کے صوبہ خیبر پختونخوا کے ضلع باجوڑ میں حلقہ این اے 8 کے ضمنی انتخابات کے لیے پاکستان پیپلز پارٹی کے امیدوار اخونزادہ چٹان کی گاڑی کو سٹرک کے کنارے نصب بم سے نشانہ بنایا گیا ہے تاہم وہ محفوظ رہے ہیں۔
مزید پڑھیں
ڈپٹی سپرنٹنڈنٹ آف پولیس (ڈی ایس پی ) بخت منیر نے بتایا ہے کہ اخونزادہ چٹان کی گاڑی پر بم حملہ کیا گیا ہے تاہم وہ اس دھماکے میں محفوظ رہے جب کہ ان کی گاڑی کو بری طرح نقصان پہنچا ہے۔ اخونزادہ چٹان جلسے سے خطاب کے بعد واپس جا رہے تھے۔
ڈی ایس پی کے مطابق دھماکا خیزمواد سڑک کنارےکھڑی ایک موٹرسائیکل میں نصب کیا گیا تھا جونہی اخونزادہ چٹان کی گاڑی موٹر سائیکل کے قریب پہنچی تو اچانک دھماکا خیز مواد پھٹ گیا۔
پولیس کے مطابق واقعہ ماموند بادان روڈ پر پیش آیا۔ جہاں پولیس کے مطابق موٹر سائیکل میں نصب ریمورٹ کنٹرول بم سے نشانہ بنایا گیا۔ پولیس نے بتایا کہ اخونزادہ چٹان کی گاڑی موٹر سائیکل کے قریب پہنچی تو زور دار دھماکہ ہوا جس میں گاڑی کو نقصان پہنچا ہے تاہم پی پی پی رہنما اور ان کے ساتھ اور محافظ محفوظ رہے۔ دھماکے کے فورا بعد پولیس موقع پر پہنچ گئی اور تفتیش شروع کردی۔
پولیس نے بتایا کہ دھماکے کے بعد ملزمان کی تلاش شروع کر دی گئی ہے جبکہ پولیس جائے وقوع سے شواہد بھی اکٹھے کر رہی ہے۔
یار رہے کہ خیبر پختونخوا کے2 قومی اور 2 صوبائی اسمبلی کی نشستوں پر انتخابات 21 اپریل کو ہونے جائے رہے ہیں۔ جس کے لیے الیکشن کمیشن نے تمام تیاریاں مکمل کر لی ہیں۔ الیکشن کمیشن کے مطابق این اے 8 باجوڑ پر سات امیدوار میدان میں ہیں اور الیکشن کے لیے مجموعی طور پر 366 پولنگ اسٹیشن قائم کیے گئے ہیں۔ جبکہ 6 لاکھ 72 ہزار رجسٹرڈ ووٹرز حق رائے رہی کا استعمال کریں گے۔
واضح رہے کہ 31 جنوری کو انتخابی مہم کے دوران اسی حلقے میں آزاد امیدوار ریحان زیب خان کو فائرنگ کرکے قتل کردیا گیا تھا، وہ این اے 8 اور پی کے 22 سے امیدوار تھے جس کے بعد یہاں الیکشن ملتوی کر دیے گئے تھے۔
