پاکستان تحریک انصاف کے مرکزی رہنماؤں نے صدر مملکت آصف زرداری کے پارلیمنٹ کے مشترکہ اجلاس سے کیے گئے خطاب پر تنقید کی ہے۔
پارلیمنٹ کے مشترکہ اجلاس کے بعد میڈیا سے گفتگو کرتے ہوئے پی ٹی آئی رہنماؤں نے آصف زرداری اور حکومت پر تنقید کی۔
مزید پڑھیں
اپوزیشن لیڈر عمر ایوب نے میڈیا سے گفتگو کرتے ہوئے کہاکہ آج غیرقانونی صدر نے ایوان سے خطاب کیا۔ میں نے بحیثیت قائد حزب اختلاف پوائنٹ اٹھانے کی کوشش کی مگر موقع نہیں دیا گیا۔ ’قانون کے مطابق جب بھی اپوزیشن لیڈر اٹھے اسے بات کرنے کا موقع دیا جاتا ہے‘۔
آصف زرداری کو 21 توپوں کے احتجاج کی سلامی پیش کی گئی، بیرسٹر گوہر
پی ٹی آئی کے چیئرمین بیرسٹر گوہر نے اپنی گفتگو میں کہاکہ آج آصف زرداری کو 21 توپوں کے احتجاج کی سلامی پیش کی گئی، ہم اس صدر کو مانتے ہی نہیں اس کے لیے اپنا احتجاج ریکارڈ کرایا ہے۔
انہوں نے تنقید کرتے ہوئے کہاکہ صرف صدر نہیں وزیراعظم سمیت پوری کابینہ ہی غیرآئینی و غیرقانونی ہے۔
بیرسٹر گوہر نے کہاکہ ہمارے احتجاج کی وجہ سے آصف زرداری تقریر ادھوری چھوڑنے پر مجبور ہوئے۔
یادر ہے کہ آج 18 اپریل کو صدر مملکت آصف زرداری نے پارلیمنٹ کے مشترکہ اجلاس سے خطاب کیا ہے، تاہم اس موقع پر اپوزیشن کی جانب سے ایوان میں احتجاج کیا گیا۔
پی ٹی آئی کے ارکان نے عمران کے پوسٹرز اٹھائے ہوئے تھے اور ایوان میں نعرے بازی کرتے رہے۔
