اسلام آباد میں ایران کے نام کی سڑک، اور کونسی سڑکیں دوسرے ملکوں کے نام پر ہیں؟

ایران کے صدر ڈاکٹر سید ابراہیم رئیسی 3 روزہ دورے پر پاکستان پہنچ گئے ہیں۔ ابراہیم رئیسی پاکستان میں انتخابات اور نئی حکومت کے آنے کے بعد پاکستان کا دورہ کرنے والے پہلے سربراہ مملکت ہیں۔

ایران ایونیو:

ایران کے صدر ڈاکٹر سید ابراہیم رئیسی کے پاکستان دورے سے قبل وفاقی کابینہ نےسی ڈی اے کی جانب سے الیونتھ ایونیو کا نام بدل کر ’ایران ایونیو‘ رکھنے کی سمری کی منظوری دی ہے۔ فیز I کے تحت نئی شاہراہ سیکٹر D-12 سے E-11 تک تعمیر کی گئی ہے۔ اسے دوسرے مرحلے میں آئی جے پرنسپل روڈ سے جوڑا جائے گا۔

ایرانی صدر کے ساتھ ان کی شریک حیات اور وزیر خارجہ اور کابینہ کے دیگر ارکان، اعلیٰ حکام کے ساتھ ساتھ ایک بڑا تجارتی وفد بھی پاکستان پہنچا ہے۔

فیصل ایونیو:

وفاقی دارالحکومت اسلام آباد میں سعودی عرب کے سابق فرمانروا فیصل بن عبدالعزیز کی جانب سے اسلامی سربراہی کانفرنس کے موقع پر اسلام آباد میں ایک عظیم الشان مسجد کی تعمیر کا تحفہ دیا گیا۔ اپنے منفرد ڈیزائن اور جدید طرزِ تعمیر کے اس شاہکار کو شاہ فیصل کے نام سے منسوب کرتے ہوئے فیصل مسجد کا نام دیا گیا اور اسی وجہ سے اس مسجد سے ملحقہ مرکزی شاہراہ کو آج فیصل ایونیو کے نام سے جانا جاتا ہے۔

کمال اتاترک ایونیو:

اسلام آباد میں پلاسٹک کے کچرے سے بنائی گئی پہلی سڑک کا نام جدید ترکیہ کے بانی کمال اتاترک کے نام سے منسوب کی گئی ہے۔ یہ روڈ ’اتاترک ایونیو‘ کے نام سے جانی جاتی ہے۔

سری نگر ہائی وے:

اسلام آباد کی دوسری بڑی سڑک جس کو کشمیر ہائی وے کہا جاتا تھا، اس کا نام بدل کر مقبوضہ کشمیر کے شہر ’سری نگر‘ کے نام سے منسوب کیا گیا ہے، واضح رہے کہ کشمیر ہائی وے کا نام بدل کر سری نگر ہائی کشمیریوں کے ساتھ یکجہتی کے لیے رکھا گیا تھا۔

چو این لائی روڈ:

2004 میں اسلام آباد میں ڈپلومیٹک انکلیو کی طرف جانے والی ایک سڑک کا نام ’چو این لائی روڈ‘ رکھا گیا۔ پریمیئر چو این لائی کو چین پاکستان دوستی کا بانی بھی کہا جاتا ہے۔ یہی وجہ ہے کہ اس سڑک کا نام چین کے لیڈر چو این لائی کے نام پر رکھا گیا۔