بالی ووڈ اسٹار عامر خان نے اپنی کلاسک فلم ’قیامت سے قیامت تک‘ کے مشہور گانے ’پاپا کہتے ہیں بڑا نام کرے گا‘ کا نیا ورژن لانچ کیا ہے۔ نئے ورژن کو آنے والی بائیوپک ’سری کانت‘ میں شامل کیا گیا ہے اور اس میں راجکمار راؤ اور عالیہ ایف شامل ہیں۔
فلم ’سری کانت‘ کے گانے کے لانچ میں شرکت کرنے والے عامر خان نے بتایا کہ کس طرح ان کی پہلی فلم کا گانا ’پاپا کہتے ہیں‘ ان کے کیریئر میں بہت اہمیت رکھتا ہے۔ تقریب کے دوران ’تھری ایڈیٹس’ کے اداکار نے نابینا بینڈ کے ساتھ پرفارم بھی کیا اور انہیں ’قیامت سے قیامت تک‘ کے مقبول گانے ’اے میرے ہمسفر‘ گاتے ہوئے دیکھا گیا۔
مزید پڑھیں
اس موقع پر بات کرتے ہوئے عامرخان نے کہا کہ یہ وہ گانا ہے جس نے میرے کیریئر کا آغاز کیا تھا۔ یہ بہت خاص ہے، ہم سب ابھی شروع کر رہے تھے یہ ایک دلچسپ سفر تھا۔ ہم نہیں جانتے تھے کہ یہ کام کرے گا یا نہیں؟ منصور اور میں فلم کے ساتھ مسائل تلاش کرتے تھے۔ ان کا کہنا تھا کہ فلم ریلیز ہوئی اور پھر یہ ہمارے ہاتھ سے نکل گئی۔ مجھے لگتا ہے کہ یہ ہندوستانی سنیما میں ایک سنگ میل ہے۔
’پاپا کہتے ہیں‘ کے نئے ورژن میں سری کانت کی زندگی کے سفر کی جھلک دکھائی گئی ہے، جس میں پیدائش سے لے کر ایک کاروباری شخصیت کے طور پر کامیابی حاصل کرنے تک کی عکاسی کی گئی ہے۔ اس میں ان کی زندگی کے مختلف پہلوؤں کا احاطہ کیا گیا ہے، جیسے ان کے بین الاقوامی تجربات، رومانوی تعلقات اور ان رکاوٹوں کا ذکر جو انہیں اپنے سفر کے دوران پیش آئیں۔ فلم ’سری کانت‘ 10 مئی 2024 کو موسم گرما کی تعطیلات کے دوران ریلیز کی جائے گی۔
