کارِ سرکار میں مداخلت، محمود خان اچکزئی کے وارنٹ گرفتاری جاری

کار سرکار میں مداخلت کی بنیاد پر چیئرمین پشتونخوا ملی عوامی پارٹی کے صدر محمود خان اچکزئی کے وارنٹ گرفتاری جاری کردیے گئے ہیں۔

جوڈیشل مجسٹریٹ کوئٹہ نے محمود خان اچکزئی کے وارنٹ گرفتاری تھانہ گوالمنڈی کی ایف آئی آر نمبر 43 سال 2024 کے مقدمہ میں وارنٹ گرفتاری جاری کیے ہیں۔

محمود خان اچکزئی کے صدارتی امیدوار بنتے ہی ضلعی انتظامیہ نے ان کے گھر پرغیر قانونی تجاوزات سے متعلق کارروائی کے لیے چھاپہ مارا تھا۔

چھاپے کے بعد ضلعی انتظامیہ نے محمود خان اچکزئی کیخلاف، جواس وقت گھر پر موجود نہ تھے، کار سرکار میں مداخلت کا مقدمہ درج کیا تھا۔

ضلعی انتظامیہ کی جانب سے اسی ایف آئی آر میں پیش نہ ہونے پر جوڈیشل مجسٹریٹ نے وارنٹ جاری کیے ہیں۔

22 اپریل کی تاریخ کو جاری کیے گئے وارنٹ میں پولیس کو ہدایت کی گئی ہے کہ محمود خان اچکزئی کو گرفتار کرکے 27 اپریل کو پیش کیا جائے۔