محمود خان اچکزئی کے خلاف کار سرکار میں مداخلت کا مقدمہ خارج

بلوچستان ہائیکورٹ نے پشتونخواملی عوامی پارٹی کے سربراہ محمود خان اچکزئی کے خلاف درج مقدمہ خارج کرتے ہوئے انہیں الزامات سے بری کر دیا ہے۔

پشتونخواملی عوامی پارٹی کے سربراہ محمود خان اچکزئی کے خلاف سرکاری اراضی پر قبضہ اور کارسرکار میں مداخلت کا الزام تھا، اسی الزام کی بنیاد پر ان کے خلاف بلوچستان ہائیکورٹ میں مقدمہ درج کیا گیا تھا۔

جمعرات کو محمود خان اچکزئی کیس کی سماعت کرتے ہوئے بلوچستان ہائیکورٹ نے ان کے خلاف دائر ایف آئی آر کو بے بنیاد اور من گھڑت قرار دیتے ہوئے معطل کر دیا۔

محمود خان اچکزئی کے خلاف پشتونخوا لائرز فورم نے بلوچستان ہائیکورٹ میں آئینی پٹیشن دائر کی تھی، کیس کی پیروی ایڈووکیٹ کامران مرتضیٰ،  ایڈووکیٹ حبیب اللہ ناصراور دیگر نے کی، جوڈیشل مجسٹریٹ کی عدالت میں عدم پیشی پر محمود خان اچکزئی کے وارنٹ گرفتاری بھی جاری کیے تھے ۔

تاہم جمعرات کو سماعت کے دوران پشتونخواملی عوامی پارٹی کے سربراہ محمود خان اچکزئی کو سرکاری اراضی پر قبضہ اور کارسرکار میں مداخلت کا الزام سے بری کر دیا گیااور بلوچستان ہائیکورٹ نے ان کے خلاف دائر درخواست کو خارج کر دیا۔