بالی ووڈ اسٹار سلمان خان کے گھر پر فائرنگ کے واقعہ کے بعد قیاس آرائیاں کی جارہی ہیں کہ وہ باندرہ، ممئی میں واقع اپنی رہائش گاہ ’گلیکسی اپارٹمنٹ‘ کو چھوڑ کر کہیں اور منتقل ہوجائیں گے۔
مزید پڑھیں
اس حوالے سے سلمان خان کے بھائی اور سینیئر اداکار ارباز خان سے جب سوال کیا گیا کہ کیا فائرنگ واقعہ کے بعد سلمان اور ان کا خاندان گلیکسی اپارٹمنٹ چھوڑ کر کہیں اور منتقل ہونے کا سوچ رہے ہیں تو ارباز نے جواب دیا کہ سلمان اور ہمارے والد سلیم خان کئی سال تک اس اپارٹمنٹ میں رہے ہیں اور شفٹنگ سے حقیقت تبدیل نہیں ہوجائے گی۔
ارباز خان نے کہا، ’کیا آپ کو لگتا ہے کہ دھمکیاں ختم ہوجائیں گی؟ اگر آپ کو لگتا ہے کہ مستقبل میں کہیں منتقل ہونے سے آپ کو دھمکیاں ملنا بند ہوجائیں گی تو اس صورت میں آپ کو شفٹ کرنا چاہیے۔‘
’گھر خالی کرنے کا کسی نے نہیں کہا‘
انہوں نے کہا، ’لیکن حقیقت یہ ہے کہ دھمکیاں ملنا بند نہیں ہوں گی، ایسی صورت میں کیا آپ شفٹ ہوتے رہیں گے یا احتیاطی تدابیر اختیار کریں گے۔‘
ارباز کا کہنا تھا کہ اس اپارٹمنٹ میں سلمان اور ان کے والد کئی سال تک رہے، انہیں کوئی یہ نہیں کہہ رہا کہ یہ جگہ خالی کردو تو تمہاری جان بخش دیں گے۔
انہوں نے کہا کہ دراصل مسئلہ یہ ہے ہی نہیں، اگر یہ مسئلہ ہوتا تو شاید سلمان گھر چھوڑنے کے بارے میں سوچتا۔ ارباز نے کہا ان حالات میں اپنی حفاظت کے لیے آپ خود یا حکومت آپ کے لیے بہترین اقدامات کرسکتی ہے۔
یاد رہے کہ 14 اپریل کو صبح 5 بجے 2 نامعلوم موٹرسائیکل سوار سلمان خان کی ممبئی کے علاقے باندرہ میں رہائش گاہ کے سامنے ہوائی فائرنگ کرکے فرار ہوگئے تھے۔ ممبئی پولیس نے 4 افراد کے خلاف مقدمہ دائر کرکے ابھی تک واقعہ میں ملوث 5 افراد کو گرفتار کیا ہے۔
فائرنگ کے واقعہ کے بعد بشنوئی گینگ کی جانب سے فائرنگ کی ذمہ داری لارنس بشنوئی کے بھائی انمول بشنوئی نے قبول کی تھی۔ فائرنگ واقعہ کے مقدمے میں انمول اور لارنس کو بھی نامزد کیا گیا ہے۔
