گوگل کا پاکستان کے لیے بڑا اعلان، کتنے اسمارٹ اسکولز بنائے جائیں گے؟

انفارمیشن ٹیکنالوجی کی  سب سے بڑی کمپنی گوگل نے وفاقی دارالحکومت اسلام آباد میں 50 اسمارٹ اسکول قائم کرنے کا منصوبہ بنایا ہے۔ یہ اسمارٹ اسکولز  30,000 ’گوگل فار ایجوکیشن آئی ڈیز‘ سے لیس ہوں گے، جہاں آرٹیفیشنل انٹیلی جنس اور دیگر ڈیجیٹل ٹولز کی تعلیم دی جائے گی۔

‘گوگل فار ایجوکیشن’ ٹیم نے اپنے پاکستانی پارٹنر ٹیک ویلی کے ساتھ، وفاقی سیکریٹری تعلیم سے ملاقات کی اور انہیں پاکستان کے تعلیمی شعبے کے لیے آنے والے منصوبے پیش کیے۔ ملاقات کے دوران مستقبل کے متعدد منصوبوں پر بھی تبادلہ خیال کیا گیا۔

ملاقات کے دوران  گوگل فار ایجوکیشن ٹولز پر اساتذہ کی ورکشاپس، ایک پبلک گوگل ریفرنس اسکول کا قیام، 2,000 نوجوانوں کو گوگل کیرئیر سرٹیفکیٹس کے ذریعےہنر مند بنانے اور انہیں ملازمت کے لیے تیار کرنے، اور پاکستانی وزارت تعلیم کے ساتھ مل کر ایجوٹیک ایونٹ کی میزبانی کے لیے بھی بات چیت کی گئی۔